Nga Boldnews.al
Kryeprokurorja Arta Marku deklaroi sot, ndoshta për herë të parë, se ka presion politik. Marku tha se “në qendër të debateve apo konflikteve politike ka qenë prokuroria. Politika i ka dhënë të drejtën vetes për të gjykuar çdo çështje tonën”.
Nuk dihet se kujt ia drejton këtë akuzë kryeprokurorja, por ajo që dihet është se të paktën dy dosje, të njohura si ajo 339 dhe 184, dhe që kanë të bëjnë me manipulimin e zgjedhjeve, prej muajsh janë të bllokuara.
Opozita ka denoncuar të dy dosjet, ka ngritur akuza për lidhjet e drejtuesve më të lartë të PS-së, përfshi edhe kryeministrin Rama, se kanë komunikuar me grupe apo persona me precedent kriminalë, në funksion të presioneve apo shit-blerjes së votës.
Një pjesë e dosjes 339 është publikuar në media ku personazhi kryesor është Vangjush Dako, ndërsa në lidhje me dosjen 184, opozita ka përmendur emrat e Kryeministrit Rama, ish-ministrit Damian Gjiknuri, deputetëve Ulsi Manja, Sadri Abazi, Paulin Sterkaj dhe Pjerin Ndreu, si të kapur në përgjime për manipulimin e zgjedhjeve.
Për të dy dosjet opozita ka kërkuar hetimin e plotë, ndërsa ka akuzuar Qeverinë për presione ndaj Prokurorisë dhe këtë të fundit për moszbardhjen e krimit elektoral.
Opozita sado akuza të bëjë, nuk ka asnjë shans, veçanërisht sot kur ka dorëzuar edhe mandatet e deputetëve, për të ushtruar presione ndaj organit të akuzës, Kryeprokurores apo çdo prokurori.
Sot opozita nuk ka asnjë mekanizëm në dorë, aq më tepër që me një llogjikë të thjeshtë nëse do të kishte forcë për presion, të dy dosjet në fjalë do të kishin shkuar në gjykatë.
Në fakt të dy dosjet ndodhen në organin e akuzës dhe nëse nuk do të botoheshin pjesë të tyre, do të ishte shumë e vështirë që publiku të njihej me to, apo të dinte edhe ekzistencën e tyre.
E vetmja strukturë që sot ka interes për të mbyllur hetimet, zvarritur ose lënë në harresë dosjet e krimit zgjedhor është Qeveria.
Gjithkush e ka të qartë se nëse Prokuroria do të konkudojë me dosjet, përveç problemeve ligjore të individëve të veçantë, ka rënë moralisht dhe ligjërisht një mazhorancë, e kapur në përgjime, qoftë edhe në mënyrë të pjesshme, duke ndryshuar vullnetin e zgjedhësve.
Këtë e di qoftë Rama si kryeministër, qoftë Basha si lider i opozitës, që dhe insiston në zbardhjen e dosjeve, ashtu edhe ndërkombëtarët, qofshin Ambasadorë në Tiranë apo europarlamentarë në Bruksel.
Sot Kryeprokurorja pohoi presionin, pa drejtuar direkt gishtin se nga cila anë vjen ai. Nga Shkodra, ajo dha një paralajmërim, që ndoshta mund ta përdorë edhe si justifikim apo si një shfajësim sepse nuk zbardhi dosjet që trondisin qeverinë e sotme.
