Stop dhunës ndaj personelit mjekësor. Me këtë moto bluzat e bardha në kanë zhvilluar një protestë kombëtare mëngjesin e sotëm, duke dënuar rastet e dhunës të shfaqura në javët e fundit ndaj kolegëve të tyre në disa qendra spitalore.
“Po dhunohemi dhe persekutohemi, të korrigjohen politikat mjekësore. Dhuna është kthyer në një sëmundje kronike, ndërkohë që ne jemi në shërbim të qytetarëve. Nuk janë mjekët ata që krijojnë probleme, bluza e mjekut duhet të konsiderohet e shenjtë”, u shprehën mjekë të QSUT-së në protestën e tyre para godinës së kësaj qendre spitalore.
“Spitalet tona janë ambiente që ofrojne siguri, mbrojtje, shpëtim jete. Thirrje për bashkim, për të ndaluar dhunën.
Thirrje për politikbërjen, drejtues dhe administratorë të institucioneve, për të hetuar shkaqet, faktorët që ndikojnë në këtë situatë.
Dhuna në kushtet e punës duhet të marre ndëshkimin e merituar”, tha mjeku Arjan Harxhi
Mjeku Tritan Kalo ka kërkuar ndërhyrje për të marrë të gjitha masat në mbrojtje të mjekëve dhe të bluzës së bardhë, që është e shenjtë.
“Mos harroni që në 1997 kur tërë shteti u shkërmoq ishin mjekët ata që qëndruan gati për të ofruar ndihmë.
Nuk i keni nga mjekët problemet, nuk jeni të varfër nga mjekët, e nëse flitet që për ata që shkelin barin në fushën e futbollit të dënohen 3 vjet, ata që dhunojnë mjekët e kanë pak edhe 30 vjet”, tha Kalo.
Protestës i është bashkuar edhe zv.ministrja e Shendetësisë, Rakacolli, e cila e cilësoi dhunën ndaj mjekëve si të papranueshme. Sipas saj, dhuna nuk zgjidh problemet, ndërsa paralajmëroi ndryshime në Kodin Penal lidhur me dënimet ndaj dhunuesve të bluzave të bardha.
Mjekët kanë apeluar që qytetarët të mirëkuptojnë bluzat e bardha, ndërsa kanë bërë thirrje për dënimin maksimal të agresorëve. Mjekët janë shprehur se dhuna ndaj tyre të konsiderohet një akt kriminal.
Edhe ditën e djeshme mjekët protestuan, duke deklaruar se ndihen të kërcënuar për jetën dhe në presion gjatë ushtrimit të detyrës, ndaj kërkuan siguri fizike në punën e tyre.
Rasti i fundit në QSUT ishte ushtrimi i dhunës ndaj mjekes specializante që ndodhi javën e kaluar.
Një tjetër problematikë që ngrejnë mjekët specializantë është edhe mungesa e pagësës për periudhën katër vjeçarë të specializimit.
