Oerd Bylykbashi, ish-deputet i PD-së, deklaroi se opozita nuk ka për të bërë pas pas.
I pranishëm në studion e News 24, Bylykbashi akuzoi Kryeministrin Edi Rama se ka kapur të gjitha pushtetet, ndërsa shtoi se askush nuk ka votuar për një qeverisje me kriminelë ose banda. Sipas tij, aksioni opozitar nuk ka më kthim pas.
Lidhur me kërkesën e opozitës për largimin e Ramës, Bylykbashi tha se ai nuk mund të garantojë zgjedhje të lira duke qëndruar në postin e Kryeministrit, ndërsa shtoi se vendi është në një krizë të shumëfishtë.
Sipas tij, rruga e vetme për të dalë nga kriza janë zgjedhjet e parakohshme.
Përsa i takon dorëzimit të mandateve nga opozita, Bylykbashi tha se ky vendim erdhi pasi në Parlament nuk kishte më hapësirë për zërin e qytetarëve. “Parlamenti është kthyer në një noter vulgar të kryeministrit”, tha Bylykbashi.
Lidhur me qëndrimin e ndërkombëtarëve, Bylykbashi tha se opozita do të bëjë punën e saj, ndërsa ndërkombëtarët të tyren.
Ai shtoi se qeveria ka humbur legjitimitetin, ndërsa opozitën e re e cilësoi një marrëzi të Ramës.
