Ministrja për Marrëdhëniet me Parlamentin, Elisa Spiropali, ka renditur sukseset e Samitit të Diasporës.
Kështu Spiropali tha se u parashikuan hapa konkrete për të realizuar votimin e diasporës në Shqipëri dhe në Maqedoni.
Ajo theksoi se prej muajit korrik, në Parlament është dërguar një dokument i detajuar për mundësimin e kësaj të drejte, duke shtuar se shpreson që dokumenti të bëhet pjesë e reformës së ardhshme zgjedhore, pasi opozita të rikthehet në Parlament.
Një tjetër sukses, Spiropali renditi remitancat dhe pensioniet.
“Në 30 vitet e fundit, Shqipëria ka përfituar rreth 30 miliardë dollarë remitanca, të cilat kanë shkuar kryesisht për të financuar konsumin familjar.
Për herë të parë, tanimë ekziston një strategji për kanalizimin e këtyre remitancave në sektorët kyçë të ekonomisë, si turizmi, agroturizmi dhe prodhimi”, tha ajo.
Gjithashtu Spiropali theksoi se është dakordësuar ngritja në Tiranë e një Dhome të Përbashkët të Biznesit të Diasporës, që do të përfaqësojë të gjithë bizneset shqiptare nëpër botë.
Në këtë kuadër ajo shtoi se do të fillojë të funksionojë edhe Banka e Diasporës, që do të jetë një instrument i mirëfilltë, i mbështetur nga shteti, për përthithjen dhe kanalizimin e kapitalit të diasporës në ekonomi.
Njohja e pensioneve është një tjetër arritje që sipas Spiropalit do të mundësohet, pasi shteti shqiptar ka emëruar një Koordinator Kombëtar të Pensioneve.
Ajo sqaroi se koordinatori do të ketë për detyrë të çojë përpara negociatatme vendet ku ka më shumë shqiptarë, si Italia, Greqia, SHBA-të, Kanadaja dhe Britania e Madhe.
