Nga Boldnews.al
Kaluan testin fizik dhe të intelektit, por 250 kursantët e kursit profesional për policimin e studentëve të ekselencës, qëndruan për afër një orë të rreshtuar në këmbë, për të përfunduar fjalimet e gjata kryeministri, ministrit të Brendshëm dhe kryepolicit të shtetit. Por ia vlejti sakrifica, prej tyre mësuan shumë.
Si të mirëshkolluar, ndoshta që në këtë moment janë penduar për rrugën që zgjodhën, pasi policia aktuale duket se nuk do të ketë nevojë për policë të “zgjuar”, por për ekspertë për hedhjen e gazit lotsjellës.
Me situatën që po kalon vendi dhe me protestat e opozitës, strukturat e rendit po praktikohen gjithnjë e më shumë si të hedhin në sasi të madhe gazin lotsjellës, si të përballojnë turmat, e në çfarë mënyre të mbulojnë me trupin e tyre çdo deputet të mazhorancës që shkon e provokon protestuesit.
Kjo është rutina e përditshme policore, që tashmë më tepër se kurrë ka nevojë për “krahun e fortë”, sesa për efektivin e zgjuar të policisë kriminale, të specialistit në fushën kibernetike, apo të ekspertit ekonomik në luftën kundër korrupsionit. Si gjithnjë realiteti i rëndë duhet mbuluar dhe këtë më mirë se shumëkush e bëjnë drejtuesit e pushtetit, duke paraqitur një Shqipëri virtuale, atë që nuk është, por që do të duhet të ishte.
“Edhe pse skeptikët nuk besonin se vajza dhe djem kaq cilësorë do të zgjidhnin policinë si karrierën e tyre profesionale, sot ata janë gjithnjë e më shumë. Përgjigja e më të mirëve për t’ju bërë pjesë Policisë së Shtetit është ogur që do të pasoruni më tej me kontributin tuaj të mëtejshëm dhe ky edukim është po aq i mirë sa pedagogët, partnerët dhe institucionet ndërkombëtare”-tha në fjalën e tij ministri Sandër Lleshaj.
Po ashtu edhe kryepolicin Veliu dhe kryeministri Rama mbajtën ison e fjalëve të stërdëgjuara se për specialistë të tillë që do të luftojnë krimin e organizuar dhe korrupsionin ka vend gjithnjë në strukturat e rendit. Nën lëvdata për pushtetin kryeministri i ftoi kursantët që të dilnin me rezultate të larta, pasi një punë e madhe i pret në kontributin e tyre.
Me mbarimin e këtij kursi, shumë prej efektivëve me pasion dhe ideale mund tu gjendet një punë, por që në ditët e para rrezikojnë të zhgënjehen nga shefi militant, nga servili që ngjitet pas pushtetit dhe nga “të fortët” që hedhin gazin lostsjellës ndaj qytetarëve, qofshin ata edhe opozitarë.
