Në përpjekje për ta paraqitur si një tubim të fragmentuar dhe pa drejtim, deputetja e Partisë Socialiste, Briseida Çakërri, ka deklaruar se protesta që vijon prej 21 ditësh para Kryeministrisë nuk është më qytetare, por politike.
Deklarata e saj vjen në një kohë kur në terren është dukshëm rritur pjesëmarrja dhe organizimi i protestës, përfshirë edhe angazhimin e qytetarëve nga diaspora dhe grupe të ndryshme mbështetëse, duke e bërë atë një nga tubimet më të mëdha të ditëve të fundit.
E ftuar në A2 CNN, Çakërri u shpreh se në protestë janë të pranishme përfaqësues të partive të reja dhe të opozitës, të cilët sipas saj po e përdorin tubimin për qëllime elektorale.
“Grupet politike aty kanë dalë hapur, qoftë nga partia Mundësia, Arlindi, Adriatiku, Euroatlantiku, PD-ja, të gjithë janë aty për të rritur numrin e tyre të votuesve. Kjo protestë s’është më qytetare, është politike. Do ta them në mënyrën më popullore të mundshme, i ngjan një turlie ku janë partitë e vogla, me bamje, speca, patëllxhan e të gjitha, por s’ka mish, s’ka kokë, dhe do të thotë që s’do dalë asgjëkundi për sa kohë hynë partitë e vogla”, u shpreh ajo.
Ndërkohë, protesta para Kryeministrisë vijon në ditën e saj të 21-të, me pjesëmarrje të shtuar dhe një mobilizim të gjerë qytetar, përfshirë edhe shqiptarë nga diaspora, të cilët kanë qenë pjesë aktive e tubimit në shesh.
