Ata që duan të përdorin simbolet e LSI-së duhet të kenë kujdes, pasi asnjë s’do t’ua falë. Ishte ky paralajmërimi që Monika Kryemadhi, kryetare e LSI-së ka bërë gjatë një takimi me të rinjtë e kësaj partie, duke iu drejtuar kandidatëve që kanë pranuar të marrin mandatet dhe të zëvendësojnë deputetët e kësaj force politike.
Kryemadhi tha se shqiptarët e dinë që as i keni takuar, as i jeni përgjigjur në telefona kur ju kanë kontaktuar, ndaj kini kujdes se askush nuk harron.
Lidhur me protestat, Kryemadhi tha se ato nuk janë politike, pasi qytetarët po dalin për hallet dhe problemet e tyre.
“Protesta nuk është politike. Njerëzit nuk dalin as për Lulin e as për Monikën. Njerëzit në shesh kanë dalë për hallet e tyre, ashtu si protesta e studentëve për çmimet e taksat e larta, kushtet e mjerueshme e shumë problematika të tjera që sollën një protestë madhështore. Pakënaqësia nuk ishte as opozitare as nga një grusht njerëzish por e qindra e mijëra studentëve që i dhanë një mësim të mirë jo vetëm opozitës por të gjithë atyre njerëzve që nuk janë dakord me reformat e qeverisë e diktaturën e realitetin e hidhur e më poshtërues që kanë kaluar shqiptarët që nga 1990″, tha Kryemadhi.
Ajo deklaroi se sot jemi përballë një grushti njerëzish që përfaqësojnë ideologji kriminale, përfaqësojnë krimin e organizuar që ka ndërtuar kështjellën mbrojtëse në Shqipëri.
“Përplasja jonë nuk ka të bëjë me Europën e as ndërkombëtarët por me këtë sekt kriminal që ka kapur drejtësinë shqiptare, shtetin, qeverinë, institucionet shqiptare. Kemi dëgjuar se si ndihma ekonomike do kishte një rishpërndarje por u zvogëlua, u përjashtuan familje dhe sot shqiptarët janë më të varfër se ç’kanë qenë 5-6 vite më parë.
Neveria është jashtëzakonisht e madhe për këtë grup njerëzisht që kanë kapur shtetin. Mos kujtoni se njerëzit do tolerojnë që dikush të vendosë për fatet e tyre. Shqiptarët janë një popull i vogël, i varfër por e kanë pasur të vështirë për t’u nënshtruar. Janë bashkuar dhe kanë dalë për ekonominë e fëmijët e tyre. Janë 400 mijë shqiptarë që janë larguar nga Shqipëria. Janë larguar me qindra mijëra për shkak të pasigurisë, arsimit. Janë larguar mjekë dhe infermierë”, tha Kryemadhi.
