Sekretari i Përgjithshëm i PS-së, Taulant Balla, nuk ka nguruar të fyejë qytetarët që më 26 shkurt protestuan para Kuvendit të Shqipërisë, duke i cilësuar ata huliganë.
Madje Balla tha se përsëri më 5 mars do të ketë huliganë që do të mblidhen para Parlamentit.
“Ditën e martë kur ata sulmuan deputetët ishte frika, por edhe përpjekja e fundit për të bllokuar votimin në Kuvend të strukturës së Këshillit të Lartë të Gjyqësorit dhe Këshillit të Lartë të Prokurorisë.
Edhe të martën që vjen ne përsëri kemi disa ligje që lidhen me implementimin e Reformës në Drejtësi dhe përsëri do të ketë protestues huliganë, që do të mblidhen në hyrje të Kuvendit. Të jeni të sigurtë se nuk janë më shumë se sa jeni ju këtu. Ne jemi votuar për të çuar përpara reformën në drejtësi. Të gjitha fajet e këtyre 28 viteve, kushdo që i ka bërë, nuk ka për të shpëtuar pa u hetuar ashtu siç duhet dhe pa u dënuar ashtu siç e meritojnë”, tha Balla duke iu drejtuar të pranishmëve në Asamblenë e Zgjeruar të Partisë Socialiste Korçë.
Balla tha se PS është e vendosur të vijojë punën për zbatimin e kontratës që ka me qytetarët dhe vijimin e reformave. Ai u shpreh i bindur se në zgjedhjet e 30 Qershorit PS do të jetë fituese, sepse puna e bërë në gjithë këto vite ka treguar se Bashkia e Korçës dëshmon modelin më të mirë të qeverisjes vendore.
