Kreu Republikan, Fatmir Mediu, tha se shqiptarët nuk duhen të trajtohen si njerëz me bisht nga ndërkombëtarët. Mediu tha se nuk priste që europarlamentari Knut Fleckenstein të dilte në krah të opozitës dhe kundër qeverisë, pasi këtë se ka bërë asnjëherë më parë.
“Detyra e opozitës është që të qartësojë sa më tej këtë situatë, shikoni se çfarë ka ndodhur në Meksikë apo Kolumbi me trafikantët e drogës. A duhet të vijmë në fazën që krimi i organizuar të bëjë ligjin në Shqipëri? Nuk mund të flitet për stabilitet në kushte të tilla, por për destabilitet”, tha Mediu.
Në vijim ai shtoi se partnerët ndërkombëtarë kanë evidence që Edi Rama ka vjedhur votat me krimin e organizuar.
“Kemi bërë një lloj vetësakrifikimi për ti treguar shqiptarëve dhe ndërkombëtarëve se çfarë po ndodh në Shqipëri. Në vitin 2001 kemi qenë në zyrën e Priebes, bashkë me z. Berisha dhe takimi ishte aq i keq, sa ishte gati të na nxirrte nga zyra. Në atë kohë Priebe na tha se nëse do të na provoni manipulimin e votave, dhe ne e provuam, Parlamenti Europian doli me një rezolutë, që kushtëzoi zgjedhjen e Presidentit në atë kohë”, tha Mediu, duke shtuar se opozita tashmë duhet të tregohet e duruar dhe t’i faktojë ndërkombëtarëve atë që ka ndodhur.
Lidhur me takimin e europarlamentarët, Mediu tha se ajo që deklaron Fleckenstein mbi deklarimet e Monika Kryemadhit, që kërkuam pushtetin në tavolinë, nuk qëndron. “Nuk është deklaruar një gjë e tillë, por i kemi shpjeguar atë që ka ndodhur”, tha Mediu.
Në vijim ai shtoi se Parlament pa opozitë nuk mund të ketë dhe tentativat për të ndërtuar një opozitë jashtë asaj që ekziston do të çojë në përplasje, të cilat duhet të evitohen.
“Si mundet që një mazhorancë të deklarojë se do të krijojë një opozitë? Kemi tendencat për të shkuar drejt një shteti totalitar. Brukseli nuk ka influencë mbi z. Rama, më shumë influencë mbi të ka Turqia dhe Rusia. Asnjë nga europarlamentarët nuk do të pranonin që vendi i tyre të ishte dy vjet pa Gjykatë Kushtetuese dhe Gjykatë të Lartë”, tha Mediu. Sipas tij, ne nuk po luajnë teatër me BE dhe nuk do të ishte mirë që të shkonim drejt BE si njerëz me bisht.
DENONCO