Lulzim Basha, Kryetar i PD-së, deklaroi sot djegien e mandateve të deputetëve të opozitës.
Një ditë pas protestës së opozitës së bashkuar, Basha tha se ka lexuar siç duhet mesazhin e protestës, ndërsa ka vënë theksin te kërkesa për një qeveri tranzitore.
Kreu demokrat e cilësoi 16 Shkurtin si referendumin e shqiptarëve!
“Unë e mora mesazhin tuaj. Me anë të kësaj konference dua t’ju njoftoj se do ti propozoj Grupit Parlamentar dhe Forumeve më të larta të PD, djegien e mandateve. Koha për fjalë ka mbaruar!”, theksoi ai.
Në një konferencë për mediat, Basha theksoi se përballë nuk kemi një kryeministër dhe parti politike, por një bandë.
“Edi Rama ka ardhur në pushtet nëpërmjet bandave dhe për llogari të bandave. Ju siguroj që unë e kam kuptuar mesazhin tuaj, ai është i qartë, kështu nuk vazhdohet më, kupa është mbushur dhe derdhur.
Ne nuk do vazhdojmë të jemi fasadë e një parlamenti. Ndaj unë jam sot këtu për t’ju thënë me përgjegjësi të plotë se e kam lexuar vullnetin tuaj”, theksoi ai, një ditë pas protestës së opozitës së bashkuar.
Deklarata e Bashës
Edi Rama nuk pranoi të dëgjojë mesazhin e sovranit.Qytetarët kërkojnë zgjidhje, rrugëdalje dhe ndryshim. Ju kërkoni një qeveri të zgjedhur nga vota dhe vullneti juaj dhe jo një qeveri të zgjedhur nga krimi dhe hajdutët e oligarkisë.
Ju kërkoni një parlament që zgjidh hallet tuaja dhe jo një parlamenty të dalë nga votat e blera me paratë e krimit të organizuar dhe që noterizon vjedhjet e një kryeministri të kapur në flagrancë. Ju kërkoni një qeveri legjitime që u jep llogari qytetarëve në vend që ti fyejë dhe poshtërojë pasi i ka vjedhur.
Ju kërkoni dhe prisni që ne ti prijmë ndryshimit. Ne kemi ndjekur të gjithë rrugët institucionale për të mbrojtur demokracinë dhe interesin e qytetarëve. Por përballë nuk kemi një parti politike, nuk kemi një kryeministër dhe një qeveri politike të zgjedhur nga qytetarët. Përballë kemi një bandë që ka ardhur në pushtet nga bashkëpunimi me bandat e qeverisë për llogari të krimit.
Unë e kam dëgjuar dhe kuptuar shumë qartë mesazhin tuaj me pjesëmarrjen dhe bashkimin me protestën më të madhe që ka pasur vendi. Mesazhi juaj është i qartë, kështu nuk vazhdohet. Kupa është mbushur dhe është derdhur. Thika ka shkuar në palcë dhe koha e fjalëve ka mbaruar. Ne nuk do të vazhdojmë të jemi fasadë e një parlamenti të dalë nga zgjedhje që i ka diktuar krimi i organizuar.Mbështetja juaj e dëshmuar dje mori përmasat e një referendumi për zgjidhjen politike të ofruar nga opozita.
Ndaj unë jam sot këtu për t’iu thënë se kam lexuar vullnetin tuaj.Kam vendosur ti propozoj grupit parlamentar dhe forumeve më të larta vendimmarrëse të Partisë Demokratike djegien e mandateve parlamentare në mbështetje të qëllimit të aspiratës që ju dje dëshmuat se është mbarëkombëtare, europiane dhe e pandalshme; mbrojtjen e demokracisë dhe shtetin e së drejtës. Shqipërinë si gjithë Europa, qeveri tranzitore dhe zgjedhje të lira dhe të ndershme, parlament të popullit dhe jo të krimit.
