Opozita ka thirrur një protestë më 16 shkurt kundër qeverisë Rama, ndërsa ka hedhur idenë e një qeverie tranzitore, si të vetmen rrugë për sigurimin e zgjedhjeve të lira dhe të ndershme.
Paralelisht me takimet e drejtuesve të opozitës në rrethe të ndryshme të vendit në funksion të organizimit të protestës, Policia e Shtetit doli me një reagim të pazakontë deri më sot lidhur me protestën.
Nën drejtimin e një ish-gjenerali ushtrie, Policia e Shtetit me një deklaratë zyrtare “ndan me publikun shqetësimin për përfshirjen në atë tubim të individëve me precedentë penalë apo të nxitur nga aktorë të tretë, të cilët synojnë krijimin e një klime destabiliteti në Shqipëri.
Duke garantuar të drejtën e tubimit dhe lirinë e shprehjes së qytetarëve që manifestojnë për pikëpamjet e tyre politike, Policia e Shtetit u bën thirrje të gjithë qytetarëve që s’kanë lidhje me këtë tubim, të marrin masa për kufizimin e lëvizjes së tyre gjatë datës 16 shkurt në mjediset ku do të zhvillohet protesta.
Policia e Shtetit informon gjithashtu se do të kryejë kontrolle intensive të mjeteve në disa akse kryesore me qëllim që të parandalojë përfshirjen e personave me rekorde dhe precedentë kriminalë në protestën e datës 16 shkurt në interes të sigurisë së pjesëmarrësve të saj dhe të qytetarëve të tjerë”.
Kjo ishte hera e parë në të paktën 20 vitet e fundit që Policia e Shtetit, përpara një proteste, bën një paralajmërim të tillë.
Zakonisht qytetarët shqiptarë ishin mësuar me deklaratat e bëra nga Ambasadat, që sa herë në Shqipëri, ndodhnin protesta i kërkonin shtetasve të tyre të shmangnin grumbullimet, pasi situate mund të precipitonte në dhunë.
Sot një paralajmërim të tillë e ka dhënë vetëm policia, ndërsa për herë të parë edhe Ambasada e SHBA ka hequr apelin drejtuar shtetasve amerikanë për të shmangur vendin apo rrugët ku do të protestohet.
“E drejta e qytetarëve për t’u mbledhur, për t’i bërë kërkesa qeverisë dhe për të protestuar për ndryshim pozitiv janë simbole të një shoqërie demokratike të lirë dhe të shëndetshme.
Është një e drejtë që ushtrohet shpesh në Shtetet e Bashkuara. Megjithatë, kjo e drejtë duhet ushtruar paqësisht. Dhuna kundër njerëzve ose pronës është e papranueshme.
Ne iu bëjmë thirrje të gjithë atyre që janë përfshirë në protestën e së shtunës, dhe të gjithë udhëheqësve politikë shqiptarë, të refuzojnë dhunën dhe të sigurohen që protestat të zhvillohen paqësisht dhe në mënyrë konstruktive”, thuhet në deklaratën zyrtare të Ambasadës së SHBA.
Kaq mjafton për të kuptuar rolin e ri që ka marrë policia e Ramës nën drejtimin e ish-gjeneral Lleshit dhe çfarë kërkojnë ndërkombëtarët nga politika dhe qytetarët shqiptarë. /Boldnews.al/
