Një punonjës i Gardës së Republikës, Alket Arapaj, tashmë i arrestuar nga policia, vrau me armën e shërbimit gruan e tij. Krimi ndodhi në apartamentin ku jetonte çifti, në katin e 4-ët, të një pallati në zonën e Alliasit.
Policia ka nisur hetimet, ndërsa në banesë ndodhej vetëm fëmija i mitur i çiftit.
Paraprakisht dyshohet se shkak i vrasjes ka qenë një konflikt i çastit.
Fqinjët e gardistit Alket Arapaj, kanë shprehur habinë lidhur me ngjarjen e rëndë, ndërsa shprehin konsideratat për familjen.
Fillimisht u tha se ngjarja u njoftua nga fqinjët pasi dëgjuan një krismë pistolete, por ata mohojnë që të kenë dëgjuar të shtëna.
Si gardisti, ashtu edhe bashkëshortja e tij, ishin besimtarë, dhe kjo mund të dallohej lehtë nga fotot që postonin në rrjetin social.
“Familje e mirë, ka kaq vite këtu. Si nënë edhe i ati shumë i mirë. Edhe ai ishte shumë i mirë, ishin njerëz me fe, se faleshin. Ne jemi habitur kur dëgjuam këtë lajm. Do ketë qenë ndonjë moment, ose do ta ketë bërë padashje. Nuk ka mundësi që një njeri kaq i mirë të vriste gruan. Edhe gruaja ishte shumë e mirë.
Asnjë të shtënë nuk kam dëgjuar. Ishte familje e rregullt.
Kur e morëm vesh tani kemi mbetur pa fjalë. Kanë vite që jetojnë edhe këta”, janë disa nga dëshmitë e fqinjëve.
Tashmë policisë i mbetet të zbardhë ngjarjen, arsyet që shtynë gardistin të qëllonte mbi bashkëshorten. Dyshimet janë se gjithçka ka ndodhur në debat e sipër dhe ndoshta konflikti ka lindur pasi viktima kërkonte të fillonte punë.
