Kryetari i PD-së, Lulzim Basha, ka zhvilluar një bashkëbisedim me studentë dhe pedagogë të Universitetit “Ismail Qemali” në Vlorë, ku vuri theksin te mungesa e mbështetjes për arsimin e lartë nga qeveria.
Basha tha se situata është agravuar veçanërisht pas miratimit të Ligjit për Arsimin e Lartë, ndërsa shprehu mbështetje për studentët dhe pedagogët që kanë paraqitur kërkesat e tyre.
“Vendi nuk do të ketë asnjë të ardhme nëse nuk do të ketë një financim të arsimit në tërësi dhe kur flasim për 5 %, mendoj se ky është minimumi i minimumeve. Vetëm këtë vit do të shpenzohen 1.5 miliardë lekë për 3 apo 4 konçensionarë në skemat e famshme të PPP-ve, për projekte që askush nuk e di si janë tenderuar dhe çfarë të mirash do i sjellin vendin”, tha Basha, duke e cilësuar si kriminale politikën e ndjekur.
Për kreun demokrat, plani i PD për të nxjerrë arsimin nga kjo krizë ku ndodhet ndahet në 3 komponentë: cilësia e mësimdhënies, e cila duhet të nisë që në arsimin parauniversitar. Në vijim Basha foli për financimin e mësimdhënies, duke shtuar se sistemi 9 vjeçar dhe i mesëm është në kolaps total për shkak të mungesës së financimeve dhe emërimet e militantëve.
“Ne kemi gabimet tona, por kurrë nuk ishte imagjinuar që pas 3 dekadave, sekti kriminal që është Rilindja, të emëronte injorantë dhe njerëz me preçedentë kriminalë në krye të shkollave apo zyrave arsimore.
Kjo ka shkatërruar totalisht besimin e nxënësve dhe prindërve të tyre te arsimi publik”, tha Basha.
Kreu demokrat tha se ngjarja e rëndë në Kavajë është reflektim i asaj që ka ndodhur me drejtimin e bashkive nga njerëz të inkriminuar, me akuza të rënda.
Basha tha se mësues të nderuar po hidhen në rrugë dhe zëvendësohen nga militantët.
“Në 2019 kishin 20 % të rënies së numrit të maturantëve, pse ka ndodhur kjo? Sepse kanë emigruar dhe këtë shifër e kemi të reflektuar edhe në Universitetet”, tha Basha.
Kreu demokrat foli për një program ambicioz për të nxjerrë arsimin nga kolapsi.
“Anglishtja duhet të jetë gjuha e dytë, jo me paratë e prindërve të tyre, por e garantuar nga sistemi arsimor 9 vjeçar dhe i mesëm”, tha Basha, duke shtuar se duhet një rikonceptim i shkollave, si nyjet limfatike të shoqërisë.
