Ka nisur me batuta seanca e sotme e Kuvendit, ku Ministri i Brendshëm, Sandër Lleshaj replikoi kreun demokrat Lulzim Bashën lidhur me rendin dhe situatën e krijuar në vend.
“Zoti Basha ju falënderoj që me dhatë mundësinë përmes gishtit tregues t’ju përgjigjem, mos u mundo ta tregosh kurrë ndaj meje. Ironia e historisë bën që ju të përdorni pafund bojë të zezë për të nxirë Shqipërinë, por përpjekja juaj është butaforike,” u shpreh Lleshaj.
Ai gjithashtu u shpreh se ‘gjatë kohës që ai do të jetë Ministër i Brendshëm nuk do të ketë as viktima e as trazira në rrugët e Shqipërisë’.
Duke iu drejtuar Bashës, ministri i Brendshëm u shpreh: “Nuk do arrish kurrë të më shohësh si ty në 2011, që le 4 viktima në bulevard. Sa herë të tregosh gishtin butaforik drejt meje, kujto historinë ke 4 të vrarë, mbi 100 të plagosur 4000 në tentativë për ti vrarë se ju lëshove plumbat mbi kokë, mendohu mirë”,vijoi ai.
Por në replikë me ministrin e Brendshëm, Basha tha se kur gishti tregon hënën, budallai tregon gishtin.
“Tani duhet të pyesësh Edi Ramën pse promovoi ato që shtinë, ndaj atyre që solli për t’i vrarë.
Kur unë isha ministër i Brendshëm dhe i siguruam shqiptarëve lëvizjen pa viza, ti mendoje të gjeje alibitë se si të pengonit heqjen e vizave dhe t’i shërbeje Edi Ramës”, tha Basha.
