Seanca parlamentare e sotme është karakterizuar nga akuza të shumta mes palëve, ku nuk kanë munguar as fyerjet mes deputetëve.
Por deputetja demokrate Rudina Hajdari, në fjalën e saj në Kuvend, ndoshta ka tentuar të çtensionojë situatën, duke kujtuar sfidën që ka Shqipëria përpara, vendimin për hapjen e negociatave. Dhe në këtë drejtim, ajo është shprehur se kjo nuk është sfidë vetëm për qeverinë, por edhe për opozitën.
“Shqipëria ndodhet para një sfide të madhe që është hapja e negociatave me BE. Kjo nuk është sfidë vetëm për qeverinë, por për të gjitha partitë politike përfshirë edhe opozitën. Ne të gjithë së bashku duhet të punojmë për të ardhmen e vendit tonë.
Demokracia në vendin tonë është në një gradë shumë të ulët, dhe kjo për shkak të mazhorancës sigurisht që edhe ne kemi pjesën tonë të përgjegjësisë.
Ne nuk kemi ende të drejtën për të pasur zgjedhje të lira dhe të ndershme. Raportet e OSBE-së për vitet 2015 dhe 2017-ë tregojnë se korrupsioni dhe krimi në vendin tonë janë në një nivel shumë të lartë, imagjino tani që është edhe më keq”, tha ajo.
