Në mediat mbështetëse të Edi Ramës dhe Ilir Metës ka shpërthyer një rivalitet absurd se kush duhet t’i rrëmbejë meritat për dhënien e shtetësisë shqiptare për kryepeshkopin Janullatos. Ndëkkohë që dashamirësit e Metës falenderojnë aktin e presidentit që theu një traditë çerekshekullore të Presidencës shqiptare ata botojnë plot bujë falendërimet që kreut të shtetit i vijnë nga Athina.
Fillimisht u raportua për mirënjohjen e shprehur nga ministri i Jashtëm Kotzias dhe më pas për telefonatën e Ilir Metës me, Presidentin e Greqisë, Prokopios Pavlopoulos. Sipas burimeve që i referohen Amna.gr homologu i tij i ka thënë Ilir Metës: “Kjo nismë e Presidentit të Shqipërisë, përbën gjithashtu një hap të rëndësishëm drejt përmirësimit të konsiderueshëm të marrëdhënieve mes Greqisë dhe Shqipërisë.”
Nga ana tjetër mediat pranë Ramës duke dashur të shfryjnë rolin e Presidentit, po pompojnë në shtyp një skenar të ndryshëm: Sipas tyre e gjitha ka qene e kanalizuar përmes qeverisë dhe Meta ka bërë vetëm noterin e një vendimi që është marrë mes Kotzias dhe Bushatit në takimin e tyre që u zhvillua në 11 nëntor në Kretë.
Në këtë pikë, pak kujt prej qytetarëve shqiptarë u intereson se kush është protagonist i këtij akti politik, Qeveria apo Presidenca. Por në rivalitetin e tyre foshnjarak, të dyja bashkë po i referohen faktit se kush merr më shumë vlerësime nga Athina dhe se kush e ka arritur i pari marrëveshjen me të.
Dhe kjo lojë kukafsheftas po nxjerr zbuluar një të vërtetë të hidhur. Duket sikur nënshtetësia shqiptare e Kryepeshkopit të Tiranës, Durrësit dhe gjithë Shqipërisë, Anastas Janullatos nuk po i jepet për meritat për ringritjen e Kishës Autoqefale Shqiptare, as për kontibutet e dhëna për besimtarët ortodoksë, as për qëndrimin çerek shekullor në Tiranë.
Kjo garë se kush merr më shumë lavde nga Athina e zhvlerëson aktin e dhënies së pasaportës dhe e paraqet atë si një qokë apo pazar që është bërë me politikanët grekë, për të marrë diçka tjetër në këmbim.
©Lapsi.al
