Në kohën kur dhjetra banesa në zonën e Kamzës pluskonin nën ujë, duket se kryetarit të Bashkisë së Kamzës, Xhelal Mziu, si ka bërë aspak përshtypje situata e rënduar. Burime të besuara nga Policia e Tiranës thanë për BalkanWeb, se Mziu nuk denjoi t’i përgjigjej thirrjes për bashkëpunim, në një kohë që banorët kërkonin ndihmë.
Në asnjë moment, ai nuk iu është përgjigjur thirrjeve telefonike dhe mesazheve, derisa zyrtarët e policisë u detyruan t’i dërgonin uniformat blu në derën e shtëpisë.
“Kryebashkiaku nuk iu përgjigj as trokitjeve të policëve në derën e vilës së tij”, tha një burim policor, ndërsa situata nga përmbytjet sa vinte e rëndohej.
Vetëm pas dhjetë orësh, ai reagoi dhe nuk nguroi të hidhte akuza për mosreagim nga ana e qeverisë. Por ndërsa Mziu, nuk dihet se ku ndodhej gjatë orëve të vështira, Shtabi i Emergjencave, kishte nisur drejt Kamzës, zjarrëfikëse dhe mjete të tjera, me qëllim evakuuimin e njerëzve që ishin në rrezik.
Ndryshe nga qytetari i parë i Kamzës, vendorët e Vorës kanë qenë mjaft bashkëpunues. Kryetari i Bashkisë së Vorës, kishte një fatkeqësi familjare, por nënkryetari ka qëndruar në kontakt të vazhdueshëm me Shtabin e Emergjencave, për cdo situatë.
