Përfundimi i mandatit të prokurorit të Përgjigjëm, Adriatik Llalla, ka hapur një tjetër debat të fortë në politikën shqiptare.
Deputeti socialist Alket Hyseni deklaroi sot se mandati i Llallës përfundon zyrtarisht më 7 dhjetor, dhe se është legjitime zgjedhja e një tjetër personi.
Mesa duket rizgjedhja e Llallës sërish në krye të këtij institucioni, duket gati e pamundur.
‘Nuk ka ndonjë interpretim, ligji e ka të përcaktuar qartë, ligji është strikt në këtë çështje. Le të shpresojmë që në ditët në vijim do të ketë zhvillime të reja në krijimin e Këshillit të Lart të Prokurorisë. Me krijimin e KLP do të vazhdohet me procedurat kushtetuese dhe ligjore për të zgjedhur edhe prokurorin i ri. Nuk mund të konceptohet që një mandat që është i mbyllur të vazhdoj më tej”, theksoi Hyseni.
Ndërkohë institucioni që do të propozojë emrin për prokurorin e përgjithshëm është Këshilli i Lartë i Prokurorisë i cili aktualisht ndodhet në ngërç. Ky institucion nuk është krijuar ende pasi nuk ka kandidat nga shoqëria civile. Për Hysenin ky është një problem lehtësisht i zgjidhshëm pasi sipas tij arsyeja se përse kanë hezituar të kandidojnë ka qenë situata politike aktuale.
“Kandidaturat nga shoqëria civile kane munguar ka pas një stepje ndoshta edhe për shkak te situatës politike te krijuar. Por uroj qe ne ditët ne vijim te marri fund ky ngërç”, tha ndër të tjera Hyseni.
