Kryeministri Rama pohoi se autoritetet shqiptare kanë patur një informacion se ndaj liderit të Partisë Demokratike Lulzim Basha po përgatitej një atentat për eliminimin e tij. Rama tha se ky informacion është trajtuar me seriozitet nga të gjitha organet shtetërore, pavarësisht se burimi ka qenë kontradiktor.
Rama: “Nuk ka asnjë skenar për të ekzekutuar kryetarin e opozitës. Ka pasur një informacion që është trajtuar me seriozitetin më të madh dhe pavarësisht se gjithë ekspertiza tregon se informacioni nuk është mjaftueshmërisht i besueshëm dhe burimi është kontradiktor, janë marrë të gjitha masat njësoj sikur kjo të ishte diçka realisht e vërtetë, sepse patjetër që siguria e të gjithë njerëzve, padiskutim dhe e kryetarit të Partisë Demokratike, është prioritet numër një, nëse kërcënohet. Por përtej çfarë pompohet në katundin mediatik ju siguroj se kryetari i PD është më i mbrojtur se asnjëherë dhe sigurisht që do të jetë tërësisht i mbrojtur deri në fund me gjithçka që shteti ka për detyrë.
Një burim i Lapsi.al tha se skenari është përgatitur jashtë vendit dhe ka pasur për qëllim destabilizimin e Shqipërisë, duke tentuar t’ia faturojë atentatin qeverisë, në pikun e krizës politike që ka mbërthyer vendin.
Burimi sqaroi se atentati do të kryhej nga vrasës me pagesë që jetojnë jashtë vendit. Tre prej tyre thuhet se janë shqiptarë dhe janë kontraktuar më parë në vitin 2011 për vrasjen e një politikani të rëndësishëm, të cilit në atë kohë iu shtuan masat e sigurisë.
Informacioni për skenarin për vrasjen e Bashës, sipas të njëjtit burim, është dhënë nga i njëjti person që ka njoftuar shërbimet e inteligjencës edhe për skenarin e vitit 2011.
