Prokuroria e Përgjithshme i është përgjigjur akuzave të ambasadorit të SHBA-së, Donald Lu të bëra gjatë paradites së sotme. Me anë të një konference për median, prokuroria është shprehur se pretendimet e ambasadorit Donald Lu janë tipike sorosiane duke e akuzuar për presione e shantazhe.
Gjatë konferencës së mbajtur në ambientet e Prokurorisë së Përgjithshme, shefja e kabinetit të Llallës, Fjorida Ballauri u shpreh se “Donald Lu është mësuar të jetë “Zot” në ambientet e politikës, por këtu nuk mund ta bëjë një gjë të tillë”.
Prokuroria e Përgjithshme i cilësoi këto sulme jo diplomatike dhe aspak të reja për prokurorinë e përgjithshme.
“Prokuroria e përgjithshme dhe prokurorët kanë mbështetur nevojën për reformin në drejtësi me qëndrime zyrtare e publike, ka identifikuar problematike në draftet përkatëse për të cilat ka shprehur qëndrimet e saj parimore. Qëndrimet kanë gjetur mbështetje edhe në opinionin e Venecias që rrëzoi një pjesë të drafteve, të mbështetur edhe nga ambasadori Lu. Sa për procedurën e KED ftojnë ambasadorin Lu dhe ekspertet e tij të rilexojnë ligjin përkatës për kriteret. Është e rëndësishme që ambasadori Lu të lexojë variantin zyrtar të tij si në shqip dhe në anglisht Prokuroria e Përgjithshme i bën të qartë zotit Lu se nëse ai është Zot në politikën shqiptare, këtë nuk e realizon në Prokurori. Lu mendon se ka në dorë fatin e prokurorisë duke shantazhuar për mbyllje hetimesh e heqje vizash, por ta ketë të qartë që prokurorët nuk kanë nevojë për viza. Presionet e tij janë sororiane që duan të manipulojnë opinionin publik.
Ky reagim i tij vjen pasi prokuroria e Përgjithshme njoftoi krerët e lartë të shtetit, Presidentin dhe Kryeministrin mbi presionet dhe shantazhet e Lu kundrejt institucionit”.
DEKLARATA E PLOTË
Prokuroria e Përgjithshme reagon ndaj deklaratave të Ambasadorit Amerikan në Tiranë
Prokuroria e Përgjithshme është gjendur ditën e sotme në një sulm të hapur dhe të paprecedent nga ambasadori aktual në Tiranë, z. Donald Lu, lidhur me qëndrimet e institucionet përsa sa i përket Reformës në Drejtësi dhe kandidaturave për anëtarë të Këshillit të Emërimeve në Drejtësi.
Dëshirojmë të njoftojmë median dhe, nëpërmjet Jush, edhe opinionin publik shqiptar se, këto sulme tërësisht jo-diplomatike nuk janë aspak të reja për institucionin e Prokurorisë së Përgjithshme.
Sa i përket Reformës në Drejtësi, Prokuroria e Përgjithshme dhe prokurorët kanë mbështetur që në fillimet e saj nevojën për reformim. Në qëndrimet zyrtare dhe publike, Prokuroria ka identifikuar problematika në draftet kushtetuese dhe ligjore, për të cilat ka shprehur qëndrimet e saj parimore dhe në frymën e së drejtës. Duhet theksuar se këto qëndrime kanë gjetur mbështetjen e plotë në Opinionin e Komisionit të Venecias, i cili, siç dihet tashmë, ka rrëzuar një pjesë të konsiderueshme të drafteve të propozuar nga ekspertët e huaj, të mbështetur publikisht nga Ambasadori Lu.
Sa i përket procedurës së kandidimit të anëtarëve për Këshillin e Emërimeve në Drejtësi, ftojmë zotin Lu dhe ekspertët e tij të rilexojnë ligjin përkatës mbi kriteret e anëtarëve të këtij institucioni. Është shumë e rëndësishme që ambasadori Lu të lexoj variantin zyrtar, si në shqip, ashtu edhe në anglisht.
Prokuroria e Përgjithshme i bën të qartë zotit Lu se, nëse është mësuar të jetë zot në ambjentet e politikës shqiptare, këtë nuk mund ta realizojë me institucionin e Prokurorisë.
Për fat të keq, Kushtetuta e Republikës së Shqipërisë ka shumë paqartësi brenda, të cilat kanë shkaktuar kaos institucional të papranueshëm.
Zoti Lu mendon se ka në dorën e tij fatin e Prokurorisë kur shantazhon institucionin për mbyllje hetimesh apo me heqje vizash. Duhet ta ketë të qartë ai dhe kushdo tjetër që, për të përmbushur detyrimet kushtetuese dhe ligjore, prokurorët e Republikës nuk kanë nevojë për viza.
Këto presione të Ambasadorit Amerikan në Tiranë janë tipike sorosiane, të cilat kërkojnë të manipulojnë opinionin publik dhe të zhvlerësojnë institucionet.
Ky reagim i Ambasadori Amerikan në Tiranë, Donald Lu, vjen menjëherë pasi Prokuroria e Përgjithshme njoftoi zyrtarisht krerët më të lartë të shtetit shqiptar, Presidentin e Republikës dhe Kryetarin e Kuvendit të Shqipërisë, mbi presionet dhe shantazhet e vazhdueshme të ambasadorit Lu kundrejt institucionit.
Duke kërkuar mirëkuptimin Tuaj për kohën, dëshirojmë t’Ju prezantojmë letrën e plotë që u është dërguar autoriteteve më të larta shtetërore shqiptare për veprimet jo-diplomatike të Ambasadorit Lu.