NGA ILIR SINANAJ
Progres raporti i fundit i Komisioni Evropian për Shqipërinë konstaton se tregtia e jashtëligjshme a lëndëve narkotike, ka një ndikim të konsiderueshëm në të ardhurat e ekonomisë së Shqipërisë. Po kështu sipas progres raportit, pesha që lëndët narkotike zënë në Prodhimin e Brendshëm Bruto të Shqipërisë zë një përqindje shumë herë më të madhe se në vendet e tjera evropiane.
“Sipas një njësie të specializuar të Organizatës së Kombeve të Bashkuara, tregtia e paligjshme e substancave që përmbajnë opium përbëjnë nxitje financiare të konsiderueshme për grupe kriminale të organizuara në Shqipëri. Fitimet e paligjshme të lëndëve narkotike përbëjnë një pjesë të konsiderueshme të Prodhimit të Brendshëm Bruto të Shqipërisë (2.6% krahasuar me 0.07% deri në 0.019% për vende si Franca, Gjermani, Italia dhe Mbretëria e Bashkuar)”, theksohet në raport
Komisioni Evropian ka kritikuar aftësinë e autoriteteve shqiptare për të asgjësuar lëndët narkotike të sekuestruara si edhe ka vënë në pah mungesën e kapaciteteve për të luftuar laboratorët e paligjshëm që prodhojnë drogave të ndryshme. Gjithashtu Komisioni Evropian shprehet se Ministria e Mjedisit duhet të përfshihet në luftën ndaj prodhimit të lëndëve narkotike.
“Kapacitetet për të menaxhuar, ruajtur apo asgjësuar lëndët narkotike të sekuestruara vazhdojnë të jenë shumë të dobëta. Asgjësimi i lëndëve narkotike nevojitet të përmirësohet. Duhet të përgatitët një protokoll për t’i besuar Ministrisë së Mjedisit detyra për të luftuar e mbjelljen e lëndëve narkotike, si monitorimin dhe kryerjen e analiza të ajrit dhe të dheut. Lëndët narkotike duhet të asgjësohen menjëherë pasi sekuestrohen dhe vetëm një sasi e vogël duhet të ruhet për analiza. Për më tepër, duhet të ngrihet një njësi e stërvitur për të luftuar laboratorët e jashtëligjshëm, ku prodhohen drogëra”, thuhet në raport.
