Ministri i Shëndetësisë Ilir Beqaj ka reaguar lidhur me audio-përgjimin e bërë nga Çlirim Hajdarmataj, ish-Kryetar i degës së Fondit të Sigurimeve të Kujdesit Shëndetësor në qytetin e Tropojës.
Ministri pranon që incizimi është i vërtetë, ndërsa tenton të justifikohet duke hedhur akuza të tjera ndaj Hajdarmataj, duke thënë se ai është shkarkuar pasi është kapur në shkelje flagrante të ligjit.
Pra, në vend që të japë dorëheqjen përderisa pranon se incizimi është i vërtetë, Beqja justifikohet duke kaluar në kundërsulm.
Në një vend demokratik, një ministër që bën një veprim të tillë do të jepte dorëheqje të menjëhershme, por në vendin tonë kur ky ministër akuzohet për korrupsion me miliona dollarë dhe se ka lënë spitalet në mëshirë është në fakt e tepërt të kërkosh më tepër.
Reagimi i plotë i Ilir Beqajt
Po, ajo çka është inçizuar dhe transmetuar sonte si një “skandal” i madh, është e vërtetë, por jo e gjithë e vërteta. Sepse, faktikisht, zotëria nuk është larguar nga puna si anëtar i padisiplinuar i PS-së dhe as është larguar me kërkesën time.
Por, është larguar pasi është kapur në shkelje flagrante të ligjit.
Shkelja në fjalë ishte se i ka paguar rrogën për tre muaj personit në detyrën e ekonomistit, i cili që nuk ka qenë fare në Shqipëri gjatë kësaj kohe.
Kështu që, duke shprehur keqardhjen që “u mbars mali e polli një mi”, si dhe duke i siguruar teleshikuesit apo lexuesit e gjysëminformuar mbi këtë episod, se hakmarrja e asnjëlloj natyre nuk është as pjesë e kulturës sime shoqërore, apo aq më pak e edukatës sime familjare, mbetem i përkushtuar në realizimin e objektivave të Qeverisë në sektorin ku kam nderin të drejtoj si ministër i shëndetësisë.
