Zgjedhjet e pjesshme në Dibër janë kthyer edhe një matje muskujsh mes mazhorancës dhe opozitës si një test për zgjedhjet e përgjithshme që mbahen vitin tjetër.
Por ndërsa e gjitha artileria e rëndë e mazhorancës u përqendrua në Dibër, duke përfshirë deputetë dhe ministra, u vu re mungesa e kreut të LSI-së, Ilir Meta, por edhe mungesa e Monika Kryemadhit, që është me origjinë nga Dibra, por edhe ish-deputete e kësaj zone.
Meta nuk ishte as në mitingun përmbyllës të fushatës, duke dërguar në emër të partisë së tij Petrit Vasilin. Ndërsa gjatë ditëve të tjera të fushatës ka qenë Luan Rama.
Por si duhet lexuar kjo mungesë e Metës?
Burime për Boldnews.al bëjnë të ditur se mungesa e Metës ka qenë e kalkuluar dhe lidhet pikërisht me faktorin çam.
Vetëm brenda pak ditëve, Partia për Drejtësi, Integrim dhe Unitet ka marrë drejtimin e disa drejtorive të rëndësishme në vend.
Afrimi i Ramës me Idrizin shikohet si një lloj kërcënimi që Edi Rama po i bën aleatit të tij më të madh për koalicionin e zgjedhjeve të ardhshme. Aq më tepër që kandidati i mazhorancës për Dibrën, Muharrem Rama, po mbështetet fuqishëm nga PDIU-ja, ndërsa nga LSI-ja ka pasur një fushatë të vakët.
Me mungesën e tij në fushatë, Meta ka lënë ti nënkuptojë Edi Ramës, se PDIU nuk mund të zëvendësojë dot fushatën e LSI-së, por edhe votat e saj dhe në këtë mënyrë e majta nuk mund të përsërisë të njëjtën fitore pa LSI-në, si në vitin 2013 kur fitoi Shukri Xhelili.
Rama nga ana tjetër kërkon të testojë nëse PDIU-ja do të jetë në gjendje të mbushë boshllëkun e votave e LSI-së për PS-në
Tashmë mbeten të pritet rezultati i zgjedhjeve për të kuptuar se kush nga Rama dhe Meta do ta fitojë bastin.
