Ish-drejtori i Operatorit të Sistemit të Transmetimit për Veriun është ekzekutuar paraditen e sotme në qendër të qytetit të Rrëshenit.
Ngjarka ka ndodhur rreth orës 9:30, ndërsa viktima Saimir Jaku ndodhej në një lokal në qendër të qytetit të Rrëshenit. Sipas policisë, 2 persona me maska kanë hyrë në ambientet e brendshme të lokalit ku Jaku po konsumonte një kafe dhe e kanë qëlluar me armë dhe më pas janë larguar me shpejtësi me makinë.
Policia është vënë në ndjekje të tyre. Saimir Jaku ishte shkarkuar 1 javë më parë nga detyra e tij si drejtor i OST Rrëshen, ndërkohë që ishte anëtar i Partisë Socialiste dhe anëtarë i Këshillit të Qarkut Lezhë.
Jaku ishte përmendur edhe nga ish-kryeministri Sali Berisha në maj të këtij viti si ‘një ish i dënuar që me Ramën kryeministër u bë drejtor’.
“Drejtorin e tensionit të lartë në Veri, Sajmir Jaku si njeri me 8 klasë shkollë dhe të dënuar në Itali me burg për drogë! Miq, për Edvin Kristaq Ramen krimi është meritë për t’u emëruar në detyrë!”, shkruante atëherë Berisha.