Nga Boldnews.al
Kryetari i Bashkisë së Kavajës, i vënë nën akuzë për dekriminalizimin, ka bërë me shpejtësi një tender për rehabilitimin e përroit të Leshniqes. Ai ka akorduar plot 3 mln USD për këtë tender, ndërsa Boldnews.al ka ndjekur hap pas hapi të gjitha procedurat. Si gjithmonë, tenderët me vlerë të madhe financiare, bëhen vetëm në mënyrë fiktive.
Sipas dokumenteve që disponon Boldnews.al, më datë 14 qershor, Bashkia e Kavajës ka lajmëruar subjektin “Vëllezërit Hysa” se janë fitues të procedurës së prokurimit me fond limit 375.000.000 lekë.
Sipas këtyre dokumenteve, firma “Salillari” ofroi për ndërtimin e kësaj vepre 365.304.850 lekë, “Alko Impex General Construction” 344,313,010 lekë, “Vëllezërit Hysa” 371,672,160 lekë, “G.P.G Company” 370,686,370 lekë dhe “Gjoka Konstruksion” 350,247,320.
Në një tender normal, me kushte të barabarta gare, fitues duhet të ishte kompania që ofronte më pak. Por le të shohim më poshtë se çfarë ka ndodhur, gjithmonë sipas dokumenteve në Agjencinë e Prokurimit Publik.
Bashkia e Kavajës ka s’kualifikuar “Salillarin”, pasi nuk ka paraqitur deklaratë ku të përshkruhen të gjitha kontratat në të cilat është i angazhuar në punë me fonde publike apo investitor privat. Nuk ka paraqitur dokumentacion të mjaftueshëm për të vërtetuar se ka të disponueshme të gjitha mjetet e kërkuara ne DST. (Mungojnë 9 kamionë vetëshkarkues mbi 20 ton, 1 kamionçine 3.5 ton, një eskavator me zinxhir me krah mbi 20m, GPS, Total Station).
Gjithashtu, Bashkia ka s’kualifikuar firmën “Alko Impex General Construction”, për shkak se kërkohet të përshkruhen të gjitha kontratat në të cilat subjekti është i angazhuar me fonde publike ose investitor privat. “Ju nuk i keni përshkruar të gjitha kontratat ku jeni i angazhuar ashtu siç kërkohet” i thotë Bashkia e Kavajës kësaj firme. Firma “G.P.G. Company” s’kualifikohet për shkak se ka detyrime të palikujduara ndaj Bashkisë Kavajë. Ndërkohë, “Gjoka Konstruksion” është s’kualifikuar për shkak se operatori ka detyrime të papaguar në shumën 6.159.387 lekë (detyrime tatim fitimi dhe detyrim për TVSH). Pra, dëshmohet qartë dhe operatori pranon se, nuk i ka plotësuar detyrimet fiskale.
Në fund, Bashkia e Kavajës ka informuar se operatori ekonomik “Vëllezërit Hysa” shpk me adresë Elbasan, Klos, Banjë fshati Banjë e re, Klos, Bashkia Cërrik, buzë Lumit Devoll, 500 m nga ura mbi lumin Devoll, se oferta e paraqitur, me një vlerë të përgjithshme prej 371,672,160 lekë pa tvsh është identifikuar si oferta e suksesshme.
Boldnews.al ka ndjekur këtë procedurë që nga momenti i shpalljes në Agjencinë e Prokurimit Publik në muajin prill. Sipas një vëzhgimi të thjeshtë, të bënte çudi vlera e lartë e këtij projekti, ndërsa, ende po u ndërtuar kjo vepër, Bashkia e Kavajës akordoi 21 milionë lekë për mbikëqyrjen e punimeve.
Duket se ngutja e Rroshit për të ndërtuar këtë vepër ka lidhje edhe me procedimin penal të hapur ndaj tij, ku ai u arrestua dhe aktualisht ndodhet në masën e arrestit shtëpiak. Rroshi ka nuhatur një shkarkim të mundshëm, dhe në kohën që politika e akuzonte se ishte dëbuar apo dënuar vite më parë në Itali, ai ka bërë letrat dhe ka firmosur me shpejtësi dhënien e 3 milionë dollarëve për ndërtimin e kësaj rruge.
