Gjykata e Tiranës ka rrëzuar vendimin e saj për të mbajtur në arrest në burg kryetarin e Bashkisë së Kavajës, Elvis Rroshi, pasi ai duhet të qëndrojë pranë dy fëmijëve të tij, të cilët jetojnë me gjyshin e tyre, të sëmurë nga veshkat.
Këto janë argumentet që kanë paraqitur avokatet e Rroshit në seancën gjyqësore për verifikimin e masës “arrest me burg”, dhënë tre ditë më parë nga gjyqtari Dritan Caka.
Gjatë seancës që zgjati rreth 45 minuta, ku në pjesën më të madhe të kohës gjyqtari u tërhoq për të marrë vendimin, avokatët e Rroshit pretenduan se masa e arrestit ishte ekstreme, pasi vepra për të cilën dyshohet nuk mund të konsiderohet penale. Po ashtu, avokatët kanë ngritur pretendimin se masa për Rroshin është dhënë, bazuar vetëm në informacione policore të Interpol dhe Europol, për të cilat mbrojtja tha që nuk përbëjnë provë. Por, argumenti kundërshtues mbi vlefshmërinë e provave policore nuk është marrë parasysh nga gjyqtari që para tre ditësh, kur vendosi masën e sigurisë “arrest në burg”. Në kushte “in extremis”, avokatët kanë përdorur kartën e fundit, gjendjen familjare të kryetarit të Bashkisë së Kavajës. Ata kanë paraqitur disa dokumente të gjendjes civile, në bazë të të cilave rezulton se Rroshi ka nën kujdesin e tij dy fëmijët. Sipas mbrojtjes, fëmijët nuk ka kush t’i mbajë në rast se Rroshi qëndron në burg, për faktin se i vetmi familjar që mund të kujdeset, babai i Rroshit, është nën trajtimin e dializës për veshkat.
Në përfundim të seancës, gjyqtari ka vlerësuar ndryshimin e masës së sigurisë, duke vendosur “arrest në shtëpi” për Rroshin, i cili dyshohet për falsifikimin në të dhënat e formularit të “Dekriminalizimit”.
Gjykata nuk ka paraqitur argumentet e saj mbi këtë vendim, pasi ato do të shpallen në një moment të dytë. Por, nisur nga argumentet e prezantuara në gjykatë, duket se Rroshi do të qëndrojë në arrest shtëpie, me qëllim për t’u kujdesur për dy fëmijët.
