Pas pezullimit të Haki Çakos, prokuroria paralajmëron nisjen e hetimeve për ministrin e Brendshëm Saimir Tahiri.
Në një operacion tepër sekret dhe të mirëkoordinuar, prokuroria ja doli të arrestojë dy punonjës policie si dhe të pezullojë Drejtorin e Përgjithshëm të Policisë së Shtetit, Haki Ccako. Kur dukej se ngjarja ishte fashitur dhe po shkonte drejt harresës, agjencia ligjzbatuese në vend, që ka të drejtën kushtetuese për hetime, ka hedhur hapat e saj.
Lajmërimi publik i prokurorisë duket që ngarkon me disa akuza dhe ka nënkuptime për zotin Çako edhe më shumë se për vartësit e tij të arrestuar. Prokuroria e ka mbyllur njoftimin e saj me një paralajmërim se hetimet vazhdojnë edhe për zyrtarë të tjerë të lartë. Por kush mund të jenë zyrtarët e tjerë më të lartë se Drejtori i Përgjithshëm i Policisë së Shtetit?!
Opozita ka akuzuar në mënyrë permanente ministrin e Brendshëm, Saimir Tahiri. Burimet nga prokuroria e konfirmojnë faktin që hetimet përfshijnë dhe zotin Tahiri, ndërsa nuk japin një afat se kur mund të ndodh thirrja, shoqërimi, ndalimi apo arrestimi i tij. Sidoqoftë, në ditët që vijnë priten zhvillime të cilat mund të çojnë së pari në arrestimin e zotit Çako dhe më pas edhe të eprorit të tij direkt.
Pajisja e përgjimit e futur në mënyrë të paligjshme në Shqipëri u denoncua së pari nga Boldnews si një skandal i cili rrezikon ta kthejë Shqipërinë në një shtet ku pushteti përgjon çdo gjë. Presidenti i Republikës, Bujar Nishani, e quajti cenim të sigurisë kombëtare futjen e një pajisje të tillë, përgjimin e bashkëpunëtorëve dhe kundërshtarëve politik nga Ministria e Brendshme.
