Ambasadori Amerikan në Tiranë, Donald Lu edhe këtë herë ka qenë i qartë me mesazhet e tij, duke folur shqip dhe me një orientim të drejtpërdrejt pë politikën shqiptare. Në publikimin e raportit për korrupsionin, Donald Lu ka sjellë një shembull, historinë e një gruaje shqiptare, e cila kishte kaluar shumë vuajtje sipas tij në sistemin gjyqësor.
“Një nga arsyet që më intereson kaq shumë korrupsioni dhe reforma në drejtësi është historia që kam dëgjuar për një grua shqiptare dhe se si një gjyqtar i korruptuar e privoi nga fëmijët e saj. Ajo ishte martuar me një burrë qe kishte rrahur për shumë vite ai ishte dënuar për krime seksuale. Ajo pa disa vitesh e la bashkëshortin në emër të sigurisë së fëmijëve. Kur shkoi në gjykatat shqiptare gjeti më shumë vuajtje. Gjyqtari ia dha burrit të saj kujdestarinë për 2 nga 3 fëmijët e saj dhe i dha gjithë pasurinë. Por përse vendosi gjykatësi në favor të një të dënuari me krime seksual, përgjigja është e thjesht; korrupsioni”, tregoi Lu.
Ambasadori theksoi se korrupsioni i shkatërron jetët e njerëzve normalë e të ndershëm. “Të pasurit dhe të fortët e bëjnë drejtësinë, ndërsa gratë, të varfrit ata pa pushtet politikë janë viktimat. Sa nga ne kanë dëgjuar histori të tilla?!”, u shpreh Lu.
Edhe këtë herë ambasadori amerikan ka dhënë në shqip një mesazh të fortë për politikanë që mendojnë se populli nuk i kupton debatet politike për reformën në drejtësi.
“Kam pasur një diskutim me një politikan, që pretendonte se populli shqiptar nuk mund ta kuptojë në të vërtetë debatin për reformën në drejtësi. Kjo është tipike për arrogancën e politikanëve që mendojnë se vetëm ata janë të zgjuar për të kuptuar se çfarë po ndodh në politikën shqiptare. Nga e kuptoj unë që për shqiptarët është e rëndësishme, nga studimet serioze. USAID ka mbështetur indeksin për perceptimin e korrupsionit. Ai është kryer në mënyrë profesionale dhe nga një numër i madh shqiptarësh në mbarë vendin. Raporti tregon pak përparim gjatë 12 muajve të fundit. Rënie me 13% e qytetarëve që tregojnë për praninë e korrupsionit. Studimi tregon se korrupsioni mbetet i madh tek udhëheqësit e partive, prokurorët, gjykatësit dhe doganierët. Nuk habitem nga ky përfundim. Njerëzit e kuptojnë. Ka ardhur koha që politikanët ta dëgjojnë popullin”, deklaroi ambasadori Lu.
