30 persona kanë denoncuar një kompani “fantazëm” e cila i mashtronte se do t`i siguronte viza në Kanada, Australi dhe Angli.
Personat kanë paguar më shumë se 2.5 milionë lekë të vjetra për qëllim emigrimi në këto shtete në kompaninë e emigrimit në rrugën “Ismail Qemali”, në kryeqytet.
Denoncimet janë bërë në Drejtorinë e Policisë së Tiranës pasi shtetasit kanë pritur më shumë se dy vite që nga koha e aplikimit dhe e kryerjes së pagesës. Ata pretendojnë se nuk kanë marrë atë që prisnin, emigrimin në Kanada Australi nëpërmjet kësaj kompanie
Sot policia e Tiranës bëri me dije se ka arrestuar shtetasit Klevis Rreshka, 25 vjeç, banues në Tiranë, ndërsa janë shpallur në kërkim L. M., 51 vjeçe, banues në Tiranë dhe A. M 28 vjeçe, banuese në Tiranë.
Luli Makashi 52 vjeç, e cila zotëron shoqërinë ‘ANDE-LM’ në Tiranë, është shpallur në kërkim nga policia pasi ka mashtruar 27 persona duke u premtuar punësim dhe studim në Kanada, Australi dhe Angli.
Së bashku me Adeila Makashin 28 vjeç dhe 25-vjeçarin Klevis Rreshka kanë mashtruar qytetarët duke u marrë shuma të konsiderueshme parash. Dyshohet se ato janë larguar nga vendi dhe kanë shkuar në Kanada.
Arrestimi i shtetasit Klevis Rreshka, u bë pasi në bashkëpunim me shtetaset L. M. dhe A. M., kanë mashtruar një numër të konsiderueshëm shtetasish duke u premtuar dokumente punësimi dhe studimi për në Kanada, Australi, Angli etj. duke u marrë shuma të konsiderueshme monetare, rreth 27 personave nga qytete të ndryshme të vendit.
Materialet proceduriale i kaluan Prokurorisë pranë Gjykatës Shkallës së Parë Tiranë, për veprën penale “Mashtrim”, parashikuar nga Neni 143/2 i Kodit Penal.
