Qeveria nuk e ka mbajtur fjalën për sigurinë e jetës së policëve dhe për më tepër mungon ligji për të përcaktuar rregullat e përfitimit të siguracionit të jetës”, ky është denoncimi i kryetari i Sindikatës së Punonjësve të Policisë së Shtetit, Sadedin Fishta.
Më tej ai ka specifikuar repartin RENEA, punonjësit e të cilit kanë punën me rrezikshmëri më të lartë, që përballen drejtpërdrejt me krimin. Edhe këta nuk kanë siguracion për jetën. Tenderi për sigurimin e jetës së Policisë së shtetit duhej bërë që në 1 mars të vitit 2015.
“Edhe pse sigurimi i jetës është i parashikuar në ligjin e ri të Policisë, ende nuk është bërë asgjë. Premtimi i Qeverisë se efektivët e Policisë, por në veçanti forcat speciale RENEA do të pajisen me siguracion jete, duket se është mbajtur vetëm në letër”, është shprehur Fishta.
Në nenin 71 të ligjit “Për Policinë e Shtetit”, thuhet se punonjësi i Policisë përfiton sigurim jete, sipas rregullave të përcaktuara me vendim të Këshillit të Ministrave. Por këtu qëndron edhe problemi. Mungesa e një VKM-je për të përcaktuar rregullat e përfitimit të siguracionit të jetës, ka bërë që deri më sot të gjithë punonjësit e Policisë të jenë të pasiguruar. Veçanërisht ata që kanë punën me rrezikshmëri më të lartë, që përballen drejtpërdrejt me krimin, forcat RENEA dhe të gjitha forcat e tjera operacionale. “Çdo punonjës Policie që dëmtohet, ose vritet për shkak të detyrës ose në detyrë, duhet të ketë edhe një kontratë sigurimi. Qeveria duhet të parashikojë fondin. Duhet të kishte parashikuar që më 1 mars të vitit të kaluar, të bënte tenderin se cila do të ishte prima dhe cila kompani do ta merrte përsipër sigurimin e punonjësve të Policisë. Absolutisht asnjë punonjës Policie nuk ka siguracion jete, pra për ndonjë dëmtim.
Veçanërisht ata që kanë punën me rrezikshmëri më të lartë, që përballen drejtpërdrejt me krimin, forcat RENEA dhe të gjitha forcat e tjera operacionale.
“Çdo punonjës Policie që dëmtohet, ose vritet për shkak të detyrës ose në detyrë, duhet të ketë edhe një kontratë sigurimi. Qeveria duhet të parashikojë fondin. Duhet të kishte parashikuar që më 1 mars të vitit të kaluar, të bënte tenderin se cila do të ishte prima dhe cila kompani do ta merrte përsipër sigurimin e punonjësve të Policisë. Absolutisht asnjë punonjës Policie nuk ka siguracion jete, pra për ndonjë dëmtim në krye të detyrës. Deri tani asnjë punonjës Policie, as i repartit RENEA, as i forcave të tjera operacionale nuk është i pajisur me siguracion jete”, u shpreh Fishta për gazetën “Panorama”.
Ndërsa përmendi edhe të gjitha kërkesat që janë renditur në padinë e depozituar tashmë në Gjykatën Kushtetuese, që kanë sjellë moszbatim të ligjit të Policisë, për shkak të mungesës së nxjerrjes së akteve nënligjore. Aty përmendet edhe fakti se, nga 1 marsi 2015, janë dy raste të rënies në detyrë të punonjësve të Policisë dhe familjarët e tyre nuk kanë përfituar asgjë, për mungesë të daljes së vendimit.
Kërkesat
Sindikata e Punonjësve të Policisë, në padinë drejtuar Gjykatës Kushtetuese, kërkon nxjerrjen e akteve nënligjore, që duhet të ishin nxjerrë brenda 6 muajve nga botimi në Fletoren Zyrtare të ligjit për Policinë e Shtetit, që ka hyrë në fuqi që më datë 1 mars 2015. Mungesa e VKMve për këtë ligj, u ka mohuar punonjësve të Policisë shumë përfitime financiare, që duhet t’i kishin marrë prej më shumë se një viti. Një ndër këto është koha e punës dhe e pushimit, si dhe kujdesi për gratë shtatzëna. Këshilli i Ministrave cakton sektorët e shërbimeve policore që dëmtojnë shëndetin e nënës dhe të fëmijës, rregullat e veçanta për kushtet e punës për punonjëset shtatzëna, si dhe rastet kur lejohet puna e natës. Punonjësve të Policisë u është mohuar gjithashtu trajtimi me ushqim, ndihma financiare në masën e një page mujore në rastet e fatkeqësive në familje, ndihma në rast të dëmtimit të rëndë të pronës për shkak të detyrës.
Po kështu, mungesa e VKMve u ka mohuar edhe të drejtën për sigurim shëndetësor të veçantë, që bëhet sipas kontratës së lidhur me shoqërinë e sigurimit. Ky sigurim mbulon shpenzimet për kontrollin parandalues, diagnostikues dhe kurues, të ofruara nga institucionet shëndetësore brenda dhe jashtë vendit. Gjithashtu, mungesa e VKMsë ka bërë që punonjësit e Policisë, të cilët emërohen apo transferohen jashtë territorit të vendbanimit të përhershëm, nuk marrin kompensim për strehim, që është e përcaktuar në nenin 70 të ligjit për Policinë.