Prokuroria e Durrësit ka nisur ndjekjen penale ndaj kujdestares së Shtëpisë së Foshnjës në Durrës, Dafina Fama, e cila akuzohet për dhunimin e fëmijës 3 vjeç e gjysmë, ngjarje e denoncuar në emisionin “Stop”.
Videoja dhe fotoja tregonin qartë shenjat e dhunës në fytyrën e fëmijës.
Sipas të dhënave zyrtare, prokuroria ka regjistruar kryesisht procedimin për veprën penale “Keqtrajtimi i të miturve, parashikuar nga neni 124/b të Kodit Penal, pas pamjeve të transmetuara në emisionin ‘Stop” të televizion ‘Klan”, të datës 31.03.2016.
Sipas urdhërit të regjistrimit të procedimit penal, Prokuroria e Durrësit shprehet se: Në emisionin e TV KLAN, “STOP”, të datës 31.03.2016, jemi vënë në dijeni lidhur me një ngjarje të denoncuar nga ky emision, ndodhur në Shtëpinë e Foshnjes, Durrës, që ka të bëjë me të dhënat për përdorimin e dhunës nga kujdestarja e kësaj shtëpie ndaj një fëmijë të moshës tre vjeç, fakt i cili, nga të dhënat e pasqyruara, përbën elementë të figurës së veprës penale të keqtrajtimi i të miturit, parashikuar nga neni 124/b të K.Penal.
“Për sqarimin e rrethanave të treguara është e domosdoshme dhe nevojitet kryerja e veprimeve hetimore paraprake të mëtejshme për të bërë të mundur sqarimin e rrethanave të faktit penal dhe individualizimin e përgjegjësive penale përkatëse”, deklaron prokuroria.
Ndërkaq mësohet se kujdestarja është marrë në pyetje nga policia e Durrësit dhe fillimisht ka mohuar dhunën e ushtruar ndaj foshnjës. Ajo ka thënë se djali është rrëzuar dhe është vrarë, ndaj i ka edhe shenjat. Por pas këmbënguljes së policisë dhe paraqitjes së provave, gruaja ka pranuar se e ka qëlluar fëmijën. Sipas raportimeve kujdestarja ka humbur ndjenjat ndërsa ka qenë duke u marrë në pyetje.
DENONCO