Me anë të reformës në drejtësi për Byronë e Hetimit, Ambasadori, Donald Lu ka deklaruar në takimin “Për qeverisje të hapur”, se do të shpenzohen miliona dollarë nga SHBA për të mos shpëtuar asnjë i “paprekshëm” pa u dënuar. Lu theksoi se modeli i Byrosë Kombëtare të Hetimit do të jetë e ngjashme me atë të FBI pasi hetuesit shqiptarë do të trajnohen nga agjentët amerikanë.
“Ka një propozim që kjo do të jetë pjesë e funksioneve të byrosë kombëtare të hetimit ose BKHsë, e bërë sipas modelit të FBIsë amerikane. Po pse duhet të besojnë shqiptarët e zakonshëm se këta policë të posaçëm do të jenë përtej ndikimeve dhe korrupsionit? Për shkak se SHBA do të investojnë që ajo të jetë e tillë. Ne kemi vënë mënjëanë miliona dollarë për të paguar pajisjet dhe trajnimet e këtyre policëve, trajnimi i tyre do të zhvillohet në akademinë e FBIsë. Një agjent i FBIsë do të caktohet në Tiranë për të mbështetur krijimin e kësaj organizate dhe të gjithë policët e BKHsë do të kalojnë përmes testeve të dallimit të gënjeshtrave, njohur ndryshe si testi i poligrafit. Llogaritë e tyre bankare do të mbikqyren për tu siguruar që ata nuk po marrin rryshfet ose që nuk po punojnë për krimin e organizuar”, u shpreh Lu.
Madje Donald Lu i frymëzuar nga filmat e përfundoi kështu fjalën e tij:
“Më lejoni ta përfundoj me një citim nga filmi “Të paprekshmit”. Njëri prej policëve elitarë i luajtuar nga aktori i famshëm Sean Connery e pyet prokurorin që është Kreu i “Të Paprekshmëve”: Ju më thatë se doni të kapni Caponen, a doni ta kapni atë me të vërtetë? A e kuptoni se ajo që po them është, çfarë jeni të përgatitur të bëni?” dhe prokurori i përgjigjet: “Gjithçka brenda ligjit”. Të sigurohemi që Shqipëria të miratojë ligjin e duhur për një njësi antikorrupsion të pavarur dhe të paepur”, tha Lu.
