Gratë, kanë qenë tema e ditës sot edhe për deputetin socialist Pandeli Majko dhe kryeministrin Edi Rama. Në konventën e PS-së, Majko tha se e kishte filluar aktivitetin në një zonë ku gratë kanë qenë forcë e madhe, në Korçë dhe se ky bekim e ka ndjekur edhe tek njësia 5.
Majko u shpreh se 50% e kandidaturave në PS në zgjedhjet e ardhshme do të jenë femra dhe i është drejtuar Ruçit:
“Gramoz mos e tund kokën kjo punë mori fund, vetëm një gjë mos na sillni, sherrin e grave”.
Majko tha se gratë e politikës shqiptare janë për tu marrë shembull, pasi sherrin e tyre e bëjnë burrat në Parlament.
Ai ka replikuar me kryeministrin Rama për deklaratat e tij se është feminist duke i kujtuar se kuptimi i fjalës “feminist” fatmirësisht ka ndryshuar me kalimin e viteve.
“Nëse vendose të ishe feminist kur u bërë socialist çfarë ishe para të bëheshe pjesë e Partisë Socialiste?”, tha Majko.
Më pas fjalën e ka marrë kryeministri Edi Rama, i cili i ka kthyer edhe përgjigje Majkos.
“…Unë u bëra kryetar, Pandi Sekretar i Përgjithshëm e të nesërmen shkuam tek partia. Ai më tha, dëgjo si fillim mos hajde më me çorape të kuqe në PS. Merre seriozisht që duhet të martohesh një orë e më parë se kjo parti mban shumë por një kryetar me çorape të kuqe dhe pa grua nuk e mban”.
Duke vijuar batutat Rama tha se Pandi është feminist dhe këtë e tregojnë gratë dhe vajzat e Njësisë 5.
“Para disa muajve ishim në një takim me gratë. Unë thashë se nuk jam feminist, por mendoj se 1.2.3…. Një zonjë e shoqërisë civile më tha se ti the që nuk je feminist por me gjithë këto që the je më shumë se aq, kështu që konsideroje veten feminist. Zapatero tha se unë jam feminist se jam socialist. Këtë ma aprovon Pandi që pavarësisht se nuk e thotë, është aq feminist sa ju do habiteshit. Ka aq shumë gra dhe vajza në njësinë 5 që do ta tregonin këtë”, tha kryeministri.
Rama kujtoi edhe thënien e Theçer. “Theçer ka thënë një të vërtetë shumë të madhe që kam pasur mundësinë ta provoj: ‘Do muhabet gjej burra, do të mbarosh punë, më mirë me gra se e mbaron më shpejt’. Me burrat, midis të thënit dhe të bërit është në mes një det i tërë. Pavarësisht se çfarë thuhet dhe dëgjohet lidhur me mua dhe me raportin tim me ministrat, debatet më të vështira dhe tërheqjet më të mëdha në debat i kam me gratë ministret jo me burrat”, tha Rama.
(Boldnews)
