Deputeti demokrat Belind Këlliçi u shpreh në emisionin “Zonë e Lirë” se personi i fundit i interesuar në Shqipëri për hapjen e negociatave është Edi Rama.
Këlliçi tha se mos hapja e negociatave nuk ka lidhje me qëndrimin apo veton e Bullgarisë, por me kushtet të cilat nuk i ka përmbushur Edi Rama.
Në këtë kuadër, deputeti demokrat tha se kushti i parë janë zgjedhjet e lira dhe të ndershme, prej të cilave Edi Rama ka frikë. “Ai organizon zgjedhje me patronazhistët, me blerjen e votave, me shkeljen e standardeve zgjedhore dhe ky është fakt, e keni në çdo raport ndërkombëtar”, tha Këlliçi. Sipas tij, kjo është një nga arsyet pse Rama nuk do hapjen e negociatave dhe ndjehet mirë, pasi në të kundërt duhet të përmbushë standardin e zgjedhjeve të lira dhe të ndershme.
Një tjetër shkak për mos hapjen e negociatave, deputeti i PD, përmendi nivelin e lartë të korrupsionit, të shtrirë në çdo qelizë të administratës, por edhe përmes tenderave dhe koncensioneve korruptive. Gjithashtu Këlliçi tha se Edi Rama ka kapur të gjitha pushtetet, përfshi edhe atë të mediave dhe drejtësinë.
