Kreu demokrat Sali Berisha tha se sot shqiptarët po përballen me rritjen më të lartë të çmimeve, ndërsa nga Qeveria nuk ka asnjë paketë ndihme.
Berisha tha se shqiptarët po shikojnë si alternativë të vetme largimin e tyre nga vendi dhe kjo për shkak se Edi Rama ka vrarë shpresën e tyre.
“Edi Rama për shkak të taksave po detyron largimin e shtresës së mesme, të cilën po e shkatërron. Nuk ka rrugë më të suksesshme për shkatërrimin e një shoqërie se ajo e shkatërrimit të biznesit të vogël. Edi Rama po synon të përzërë sa më shumë nga kjo shtresë. Me hartën e re gjyqësore do të përzërë me qindra avoketër, janë përzënë mjekë dhe inxhinierë dhe jemi kthyer në një komb që po rrisim fëmijët për emigracion”, tha Berisha.
Sipas tij, Rama po ndjek një politikë denatyruese për shqiptarët.
“Në Shqipëri nuk bëhen zgjedhje. Një akademike shprehet për një autokraci elektorale. Ne duhet të bashkohemi në një front të përbashkët për të shpëtuar Shqipërinë, të bashkojmë rezistencën tonë dhe të hidhemi në veprim. PD ka një përgjegjësi shumë të madhe në rrokullisjen që i ndodhi vendit, pasi me inaktivitetin e saj nuk u shndërrua në një forcë të madhe besimi që të bashkonte shqiptarët”, tha Berisha.
Ish-Kryeministri tha se PD pranoi politika anti-kombëtare, duke shtuar se sot në Rajon dy problemet janë Tirana dhe Prishtina, e cila nga Tirana zyrtare po paraqitet si delja e zezë.
“Ndaj këtij regjimi duhet një front, ky regjim është i pasur, ka para pafund, secili nga ne dimë raste, kur eksponentë të tij, kalojnë nga një zyrë në një tjetër duke blerë zyrtarë, opozitarë, prokurorë e gjyqtarë.
Regjimi nuk respekton asnjë ligj dhe asnjë rregull”, tha Berisha, duke shtuar se regjimi vërtet është i pasur, por është edhe i kalbur dhe do e ketë vështirë të rezistojë.
