Kryetari i PDIU, Shpëtim Idrizi paralajmëroi largimin nga koalicioni qeverisës. Duke folur në Këshillin kombëtar të kësaj force politike, Idrizi u shpreh se çështja çame nuk është trajtuar për asnjë moment nga kjo mazhorancë.
“Ne kemi të njëjtat qëndrime prej themelimit tonë dhe do ti kemi ato deri në zgjidhjen përfundimtare të çështjes së shqiptarëve të Çamërisë dhe të gjithë çështjeve të tjera kombëtare që ne përfaqësojmë. Qëllimi ynë është padyshim që të qëndrojmë në këtë bashkëqeverisje për të përçuar kauzat dhe interesat tona, mirëpo nëse ne nuk na duan atëherë ne nuk kemi më dilema. Përpara kauzave ne nuk vendosim asgjë, sigurisht përpara Shqipërisë nuk mund të vendosim dot partinë. Sot kërkoj nga ju rimandatimin tuaj që sëbashku me grupin parlamentar të vlerësojmë ecurinë e marrëveshjes dhe të dialogojmë edhe njëherë me mazhorancën për të.Në të kundërt alternativat janë të hapura, sepse prezenca jonë është e fortë dhe solide.Qytetarët na kanë besuar 5 mandate në Kuvend, pesha jonë zgjedhore është e konfirmuar dhe çdo ditë na bashkohen zemra që rrahin fort për këtë vend dhe për këto kauza.”- deklaroi Idrizi.
Edhe më herët kreu i PDIU ka shfaqur pakënaqësitë ndaj marrëveshjes me koalicioni, kjo pasi Idrizi ka kërkuar një post ministrie në qeveri ndërsa kryeministri Rama ka qëndruar indiferent ndaj kësaj kërkese.
