Shpëtim Idrizi renditi një sërë vërejtjesh për vizitën e Ditmir Bushatit në Athinë, vizitë që sipas tij, nuk përmbushi tri parime kyçe.
Në mbledhjen e Këshillit Kombëtar të PDIU-së, kreu i kësaj partie, tha se Bushati nuk ruajti as standartin e paraardhësit të tij Panariti, e jo më të kishte avancim të çështjes.
Ai deklaroi edhe njëherë se PDIU nuk do të lejojë ngritjen e varrezave për ushatarët grekë nëse nuk do të ndodhë e njëjta gjë për viktimat e genocidit të Çamërisë.
Fjalimi i Idrizit për vizitën e Ministrit Bushati:
Pak ditë më parë ne pamë vizitën e Ministrit të Jashtëm Bushati në Athinë dhe qëndrimet e tij për çështjen çame. Jam mjaft i zhgënjyer nga kjo vizitë, jo se nuk u ruajt standarti, madje u vendos një standart i ri. Nëse nuk ruhej ky standart që me aq mund ne e kemi vendosur, mjafton të kujtoj vizitën e paraardhësit të tij Panariti në Athinë sot ne do të ishim automatikisht në opozitë. Për ne nuk ka asgjë më të shenjtë sesa kauza që ne na bashkon. Ajo është vija e kuqe e padiskutueshme.Por pavarësisht se standarti u ruajt, mbetem i zhgënjyer me mosavancimin e saj aq sa duhet. Ne nuk mund të kënaqemi më me fjalë boshe dhe pa veprime konkrete.
Fakti që Ministri i jashtëm përmendi çështjen çame si një çështje rikthimi të drejtash të mohuara për çështjet pronësore është një hap përpara. Tregon vendosjen e një standarti të munguar. Unë e inkurajova Ministrin në këtë drejtim si vazhdimësi e politikës së ndjekur minimalisht nga parardhësi i tij dhe shumë Presidentë, apo Kryeministra dhe Ministra të Jashtëm që e kanë bërë vite më parë.Kjo është rrjedhojë e një ndërgjegjësimi të lartë të politikës shqiptare për çështjen çame. Dua të ndaj me ju ato që nuk shkojnë në diplomacinë shqiptare në këtë drejtim.
Zhgënjimi im vjen prej moszbatimit të tri parimeve kyçe të politikës së jashtme, diplomacisë publike, vendosjes së axhendës dhe reciprocitetit. Ministri i Jashtëm duhet ta kishte përmendur çështjen çame edhe gjatë deklaratës për shtyp me homologun grek siç bëri në takimet kokë më kokë me trupin diplomatik grek.Argumenti i dy Ministrave se çështjet bisedohen për tu zgjidhur dhe jo për tu thënë nuk qëndron.Çështje të rëndësishme si çështja çame duhet të përmenden vazhdimisht për të mos u trajtuar më si tabu në diskursin publik.
Zhgënjimi ynë është i thellë. Ruajtja e standartit nuk mund të bëhet vetëm në takimet me diplomatët por edhe në opinionin publik të vendit fqinj, me partnerët tanë dhe kudo. Ndaj them që zoti. Bushati nuk u tregua në lartësinë e duhur. Aq më shumë që rezoluta e parlamentit e datës 8.4.2004 për çështjen çame e detyronte ta trajtonte me forcë dhe hapur. Së dyti zhgënjimi ynë vjen prej mungesë së reciprocitetit mes axhendës së dy vendeve. Fatkeqësisht diplomacia shqiptare çalon.
Nëse pala greke pretendon për varreza për ushtarët grekë që kanë humbur jetën në Shqipëri, qeveria shqiptare nuk vendosi përballë kërkesën për varrezat e partizanëve dhe viktimave çame të genocidit. Nëse sot ka dy varreza të ushtarëve grekë në Bularad dhe Këlcyrë, a ka dy varreza për shqiptarët e Çamërisë në Paramfi dhe Filat?Ne jemi dakord për një varrezë për ushtarët grekë në liqenin artificial, por nëse njëra palë të fitojë dhe tjetra të dalë e poshtëruar sigurisht që kjo është e papranueshme, që nuk vendos reciprocitetin por pranon axhendën e palës tjetër.
Sa kohë që eshtrat e gjyshërve dhe stërgjyshërve tanë të vraë dhe masakruar vetëm se ishin shqiptarë të mos prehen në varreza normale ne nuk do të lejojmë të ngrihen varrezat e usharëve grekë në territorin shqiptar. Nëse pala greke kërkon të drejta të plota për pakicat greke, ne kërkojmë të drejta të plota për pakicën shqiptare në Greqi. Pakica greke jeton në fshatrat e veta ndaj dhe ne kërkojmë që shqiptarët e Çamërisë të kenë të drejtë të kthehen në trojet e tyre kombëtare.
