Është zbardhur nga autoritetet policore itinerari i lëvizjeve të Aleksandër Sadikajt që u vra dy ditë më parë. Mësohet se mbrëmjen e së premtes, ai ka qëndruar me të dashurën e tij, ku kanë darkuar në një restorant në Komunën e Parisit dhe më pas kanë shkuar në banesën e tij. Ndërkohë që në kontrollin e bërë nga policia në shtëpinë e tij janë gjetur jelek anti-plumb, municion luftarak dhe një sasi lëndësh narkotike.
Atentati i ditës së shtunë që i mori jetën Aleksandër Sadikajt nuk është aktivizuar me telefon por me telekomandë në distancë. Sipas provave të gjetura në vendngjarje, dyshohet se autorët e kanë vëzhguar 27-vjeçarin deri në momentin që kanë bërë shpërthimin. Mësohet se shmangia e përdorimit të celularëve është bërë në mënyrë që të bëhet më e vështirë zbardhja e ngjarjes nga autoritetet.
Aleksandër Sadikaj, 27 vjeç është vrarë në një atentat me tritol me telekomandë. I riu me precedentë penalë ka qenë duke udhëtuar me makinën që rezulton të jetë në pronësi të Petrit Osmanit në momentin që atentatorët kanë shpërthyer tritolin me telekomandë. Sadikaj u nxorr pa gjymtyrë nga mjeti dhe kalimtarë të rastit e dërguan në spital ku dhe ndërroi jetë. 27-vjeçari është skeduar për një sërë veprash penale si vjedhje, vrasje, plagosje dhe mosbindje e kundërshtim të forcave të policisë. Hetimet janë fokusuar në të shkuarën e të riut, por nuk përjashtohet mundësia që atentatorët të jenë ngatërruar e që shënjestra e tyre të ketë qenë Osmani.
