Përveç tensioneve mes PS-së dhe LSI-së brenda koalicionit qeverisës, një tjetër konflikt duket se është në pritje të shpërthejë, por tani mes PS-së dhe PDIU-së.
“BalkanWeb” ka mundur të sigurojë ekskluzivisht një kopje të procesverbalit me dyer të mbyllura të mbledhjes së Konferencës së Kryetarëve, të datës 26 janar 2017, gjatë së cilës kreu i grupit kuvendor socialist, Gramoz Ruçi i shpjegon prerë kryetarit të PDIU-së, Shpëtim Idrizi arysyet pse duhet të heqë dorë nga kërkesa për një hetim parlamentar për çështjen çame.
Referuar procesverbalit, Ruçi por edhe kryetarja e Komisionit parlamentar për Punët e Jashtme, Arta Dade shprehen se ngritja e një komisioni hetimor për çështjen çame nuk mund të ndodhë në prag të zgjedhjeve, duke nënkuptuar kësisoj “pasoja elektorale”.
Debati në mbledhjen me dyer të mbyllura, raporton “BalkanWeb”, ka degjenuar deri aty sa Ruçi të ketë akuzuar Idrizin se “po tallet me çështjen çame”. “Mua më duket që është të tallemi me këtë çështje. Është e pamundur që një çështje kaq madhore siç është kjo, komisioni ta zgjidhi brenda tre muajve, në prag të zgjedhjeve elektorale, për mua. E dyta, për sa i përket objektit është jashtë juridiksionit në vendin tonë dhe është jashtë funksionit tonë”, – është shprehur Ruçi.
Nga ana tjetër kreu i PDIU-së, në replikën e tij ka thënë se “e kuptova që edhe këtu paska njerëz që kanë hall mos iu mërzitet Greqia” dhe është larguar në mënyrë demonstrative nga mbledhja.
“E thashë edhe njëherë tjetër, e ndryshuam objektin për ta sjellë sensibilitet të dikujt që ka hall mos i mërzitet Greqia apo dikush tjetër dhe ne i qëndrojmë vullnetit tonë që nëse nuk ka dakordësi t’i kalohet seancës dhe seanca të shprehet me votim për këtë gjë. Për sa i përket, që është zgjedhje apo jo, këto janë çështje që nuk konsumohen. E kam dëgjuar këtë histori që në vitin 2004, kur është bërë rezoluta për shqiptarët e Çamërisë dhe nga burra dhe gra që e dinë atë çështje, i kanë dhënë dakordësinë. E kam dëgjuar edhe në diskutimin para 4 vjetësh, po tjetër retorikë që kjo bëhet për vota, bëhet para zgjedhjeve etj. etj dhe më vjen keq që e dëgjoj dhe tani. Pra, janë në prag zgjedhjet duhet ta shtyjmë, nuk kemi kohë. Kështu e kuptova. Por po ju them se ne nuk tërhiqemi, mbase do ta bëjmë nismën dyshe edhe për komision hetimor edhe për rezolutë dhe qëndrimin që ka mbajtur Qeveria shqiptare, sepse tashmë kam dyshimet e mia edhe për pozicionin e shumë vetave këtu”, – është shprehur Idrizi dhe ka braktisur në mënyrë demonstrative mbledhjen, raporton “BalkanWeb”.
Kundër ngritjes së një komisioni hetimor parlamentar për çështjen çame janë shprehur edhe kryetari socialist i Komisionit të Ligjeve, Fatmir Xhafaj, si edhe ministrja e Shtetit për Marrëdhëniet me Parlamentin, Ermonela Felaj.
Felaj ndër të tjera mësohet të jetë shprehur se “ne çështjen çame e kemi në program dhe do ishte mirë që të orientoheshim duke i drejtuar vetes pyetjen se nëse është kjo mundësia e vetme për të bërë këtë lloj hetimi? Ky lloj hetimi që në thelb është hetim i gjenocidit, është hetim penal që e bën një gjykatë ndërkombëtare penale dhe do të ishte mirë që të eksplorohej kjo mundësi. Hetimi i gjenocidit është juridiksion i Gjykatës Ndërkombëtare Penale”, – ka argumentuar ministrja.
Debati i plotë
