Policia e Shtetit ka dështuar në një tjetër operacion për kapjen e Talo Çelës. Ky i fundit dyshohej se ndodhej në Elbasan, madje ishte lokalizuar vendndodhja e tij, gjë që ka bërë që forcat speciale RENEA të nisnin operacionin për kapjen e Çelës.
Por duket se operacioni ka dështuar, pasi RENEA nuk ka mundur të kapë Talo Çelën që vijon të mbetet një nga personat më të kërkuar nga policia.
Dyshohet se operacioni i policisë për kapjen e Talo Çelës mund të jetë dekonspiruar, gjithmonë në versionin se policia ka pasur informacione të sakta mbi vendndodhjen e tij.
Nga raportimet mësohet se Çela strehohej në një nga vendet që ka qenë objekt i kontrollit nga RENEA, e cila ka ushtruar kontrolle në banesa dhe biznese, por pa gjetur gjurmë të personit të shumëkërkuar.
Gjithsesi RENEA ka shoqëruar mbi 10 persona, mes tyre edhe Kelmend Xhaferrin, i cili u kap duke shëtitur në qytet me një makinë.
Xhaferri u bë i njohur në vrasjen që ndodhi në Elbasan gjatë fushatës elektorale, ku viktimë mbeti Pjerin Xhuvani.
Emri i tij doli te incidenti i tregut agroushqimor në Elbasan, pasi Xhaferri theu postbllokun e policisë. Mirëpo ai njihet edhe për lidhje me Talo Çelën dhe pritet të merret në pyetje mbi vendndodhjen e të shumëkërkuarit.
Operacioni i RENEA duket se ka lidhje edhe me dëshmitë e dhëna nga Nuredin Dumani, i cili është kthyer në një të penduar të SPAK, duke rrëfyer me dhjetra krime apo lidhje kriminale, të cilat po verifikohen nga strukturat hetimore dhe policore.
