Kryeministri Edi Rama vijon propagandën lidhur me situatën ekonomike në vend. Ndërkohë që shqiptarët po përballen dita ditës e rritjen e çmimeve, të cilat i certifikojnë edhe Bordet e Transparencës të ngritura nga Qeveria, Rama publikon grafikë, të cilët tregojnë se Shqipëria ka nivelin më të ulët të inflacionit në krahasim me vendet e Rajonit.
Në një postim në rrjetin social, Kreu i Qeverisë ka publikuar të dhënat që krahason vendin tonë me rajonin. Sipas kryeministrit, Shqipëria ka inflacionin më të ulët në rajon. Rama thotë se për këtë ka ndikuar rritja e prodhimit vendas si dhe mbulimi 100% nga qeveria i rritjes së çmimit të energjisë.
“Mbulimi 100% nga qeveria i rritjes së çmimit të energjisë elektrike për familjarët dhe bizneset e vogla dhe rritja e prodhimit vendas, kanë bërë që rritja e inflacionit në Shqipëri të jetë më e ulëta në rajon! Këto janë të dhëna të muajit prill”, shkruan Rama.
Shqipëria sot ka çmimin më të lartë në Rajon përsa i takon karburanteve, madje ndër më të lartit krahasuar me vendet e BE-së, kjo në raport edhe me të ardhurat mesatare. Gjithashtu Shqipëria ka ndër çmimet më të larta sa i takon atyre që konsiderohen produkte të shportës, ndërsa shqiptarët nuk janë rimbursuar as vlera e rritjes së inflacionit.
