Çmimet e naftës shënuan sërish rritje në tregjet aziatike të hënën, pas përshkallëzimit të ri të tensioneve mes Amerikës dhe Iranit.
Nafta Brent u rrit me 4.30%, duke arritur në 105.6 dollarë për fuçi, ndërsa nafta amerikane WTI shënoi një rritje prej 4.72%, në 99.92 dollarë për fuçi.
Lëvizja e tregjeve u nxit nga një postim i Trump në rrjetet sociale të dielën në mbrëmje, ku ai e cilësoi përgjigjen iraniane si “krejtësisht të papranueshme”. Presidenti amerikan nuk zbuloi detaje të plota të propozimit të Teheranit, por paralajmëroi se në mungesë të një marrëveshjeje të menjëhershme, situata mund të çojë në një tjetër përshkallëzim ushtarak.
“Sapo lexova përgjigjen nga të ashtuquajturit ‘përfaqësues’ të Iranit. Nuk më pëlqen — është plotësisht e papranueshme,” tha Trump.
Siç raportohet, Irani kishte propozuar ndalimin e menjëhershëm të armiqësive në të gjitha frontet, heqjen e bllokadës amerikane ndaj eksporteve iraniane dhe njohjen e rolit të Teheranit në menaxhimin e Strait of Hormuz. Megjithatë, aleatët rajonalë të SHBA-së kundërshtuan kategorikisht çdo mundësi që Irani të kontrollojë këtë kalim strategjik detar ose të vendosë tarifa për kalimin e anijeve.
Vetëm pak orë para refuzimit të propozimit, Trump kishte akuzuar publikisht Teheranin se “po luan lojëra” dhe po përpiqet të zvarrisë negociatat, duke lënë të kuptohet se durimi i Uashingtonit ndaj bisedimeve po shteron. Tregjet tani po e kthejnë vëmendjen e tyre nga vizita e Trump në Pekin të mërkurën, ku ai pritet të takohet me Presidentin kinez Xi Jinping.
Lufta me Iranin dhe roli i mundshëm i Pekinit në rihapjen e Ngushticës së Hormuzit ka të ngjarë të jenë në qendër të bisedimeve. Analistët vlerësojnë se nëse bisedimet dështojnë plotësisht, presioni mbi naftën bruto do të intensifikohet përsëri, megjithëse mundësia e ndërhyrjes kineze aktualisht po vepron si një faktor kufizues në rritje.
