Kreu demokrat Sali Berisha nga foltorja e Kuvendit tha se është e pamoralshme që ministret kapardisen me luks, ndërkohë që qytetarët janë në varfëri.
“Po çfarë jeni ju more që shikoni ministret në luks dhe në anën tjetër keni ngritur policinë më të egër? Unë kam respekt për ministret e përulura, që janë shërbëtore të qytetarëve, por jo për ato që kanë çanta të qendisura me diamant apo zafir. Po ku jemi ne këtu në sallat e Hollywood?”, u shpreh Berisha.
Duke iu drejtuar deputetëve të PS-së, Berisha u kërkoi që të flasin për hallet e zgjedhësve dhe jo ato që i konsideron Qeveria si suksese.
“Pse nuk dilni ju këtu dhe të flisni për hallet e qytetarëve, të zgjedhësve tuaj? A keni respekt ju apo jo? Dilni këtu dhe flisni për suksese, për çfarë suksesesh? E dini ju që Qeveria do të sjell një ligj për të zhvatur të vetëpunësuarit apo jo?”, tha Berisha. Sipas tij, Parlamenti sot po sillet pa rregulla, por duke miratuar ato që sjell një njeri që është në fazë psiqike.
Ish-Kryeministri tha se ky Parlament po funksionon si dyqani personal i Lindës, nuk ka rregullore, Kushtetutë dhe ligj që drejtuesja e Parlamentit shkel për të mbrojtur Edi Ramën.
Bersha tha se pas zgjedhjes së Presidentit të ri, Edi Rama zotëron të gjitha pushtetet dhe është kthyer në një Lukashenko.
“Tiranën e ka shndërruar në një Beograd të vogël, refuzon të njohë gjenocidin në Srebrenicë. Si mund të rri unë në një sallë me një njeri që ka si interes të tij, interesat serbe dhe anti-shqiptare? Unë vij këtu në Parlament dhe nuk do të mungoj se këta qeveritarë, vetëm ju mashtrojnë dhe me çdo firmë të tyre, ata vjedhin qytetarët”, tha Berisha.
Ish-Kryeministri deklaroi se në 4 muajt e fundit importet serbe në tregun shqiptar janë rritur me 48 %, shkoni shikoni se çfarë po ndodh me mollët e Korçës, shikoni se çfarë ndodh me fermerët kudo në vend.
“Ju keni mungesë totale ndjeshmërie ndaj qytetarëve, ndaj fermerëve, fëmijëve. Ndaj iu bëj thirrje qytetarëve që të ngrihemi kundër kësaj Qeveria”, tha Berisha.
Duke iu drejtuar Ogerta Manastirliut, Berisha tha “ju qeshni, por ju duhej të kishit dhënë dorëheqjen, sepse numëroni 20 mijë viktima në kohën e pandemisë, ju duhej të ishit te Dumani në burg, se keni bërë tendera sekretë në kohë pandemie”.
