Kapja e grabitësve të dyshuar të parave të bankave u transmetua ditën e djeshme me bujë mediatike. Policia shpërndau video dhe foto nga operacioni në Vorë dhe Prezë.
Shumë e cilësuan operacionin, të ngjashëm me një filmi hollivudian aksioni ku kishte ndërthurje planesh nga helikopteri e më pas në tokë nga kamerat e trupit.
Por pjesë e kësaj shfaqje ishte edhe një punëtor, i cili punonte si kopshtar në shtëpinë e Admir Muratajt. Murataj është i shpallur në kërkim.
Në foton e mëposhtme, personi me kurriz i arrestuar dhe që është i rrethuar nga 5 policë, është kopshtari i banesës, që u gjend në kohën dhe vendin e gabuar. Kurse pranë tij pozojnë forcat speciale.
Sakaq ai që duhej të arrestohej, Admir Murataj është ende në arrati.
Sakaq “Lapsi” raporton se nga krahasimi i qelizave të celularit në zonën e Qafë-Kasharit rezultoi se Fatjon Xhyli kishte qenë aty pranë, kur ndodhi grabitja.
I njëjti person kishte qenë i dyshuar edhe për grabitjen e dhjetorit të vitit 2015.
Të shtunën, Xhyli u arrestua nga policia bashke me Ditmir Memlikën, por arrestimi i tyre nuk u bë publik. Dy grabitësit e tjerë ishin identifikuar dhe mendohet se u mbajtën në vazhgim nga policia. Arrestimi u bë ditën e martë. Të shtunën nisi inskenimi i “superoperacioni” për arrestimin e grabitësve të tjerë.
Saimir Tahiri ishte në një moment të vështirë kur ndodhi grabitja. Prej ditësh sulmohej nga të gjitha anët. Në njërën anë, linja e ngarkuar me hashash drejt Italisë, në anën tjetër grabitjet dhe vrasjet. Ngjarjet e rënda i jepnin peshë fjaleve te atyre që kërkonin dorëheqjen e Tahirit prej kohësh, kundërshtarëve politikë. Për këtë, i duhej “megaoperacioni”, si një përgjigje për kundërshtarët politikë.
Me përmasat e një spektakli, aksioni filloi me lëvizjen e blindave, helikopterëve me kameramanë dhe qindra efektivëve të armatosur në terren. Kontrolle në hotele, rrethimi i një pallati në Vorë nga forcat speciale dhe postblloqe në të gjithë autostradën.
Pjesë e spektaklit ishte edhe kontrolli i shtëpisë së boshatisur së Admir Muratajt, aty ku u gjet bahçevani, që nuk kishte as çelësat e portave të jashtme dhe të bodrumit. Banorë të zonës thanë se efektivët e armatosur hynë nga bodrumi në shtëpi, por nuk gjetën asnjeri.
Pjesë e spektaklit ishte edhe heshtja prej disa orësh e policisë, pas arrestimit të grabitësve. Me një status në Facebook, Saimir Tahiri paralajmëroi lajme të mira, ndërkohë që përgatitej konferenca e drejtorit të policisë së Tiranës, Ervin Hodaj. Gazetarëve nuk iu bë me dije menjëherë arrestimi i grabitësve, për ta bërë akoma më të nderë situatën.
I kënaqur për efektin mediatik që krijoi me kapjen e grabitesve, Saimir Tahiri nuk e ndali buzëqeshjen në daljen e Drejtorisë së Policisë. Dhe si për të shfrytezuar ne maksimum inskenimin bëri politikë, me deklaratat e “frontit të së keqes” apo “ata që nuk duan vetingun”.
Nuk ka asnjë dyshim se kapja e grabitësve ishte një sukses, por inskenimi dhe fryrja mediatike që i bëri Tahiri, për ta përdorur politikisht ngjarjen, i ngjan pamjeve filmike që shpërndan Erjon Veliaj për mediat. Vetëm se kryebashkiaku luan me autobuzët bosh, apo me këndet e lojërave, ndersa Tahiri bën teatër me qindra policë të armatosur, blinda dhe helikopterë. Banorë të Prezës thonë se Admir Murataj prej kohësh jetonte në shtëpinë e tij në Prezë dhe është zhdukur pas grabitjes së të enjtes, duke iu lënë policeve pozat me bahçevanin, raporton “Lapsi”.
