Valës së protestave kundër projektit të investimit në Zvërnec dhe politikave të qeverisë shqiptare i janë bashkuar edhe shqiptarët në Itali.
Në Torino, dhjetëra qytetarë shqiptarë kanë zhvilluar një protestë, duke shprehur kundërshtimin e tyre ndaj planeve për investimet në Zvërnec.
Në videot e siguruara nga Boldnews, protestuesit shihen me flamuj shqiptarë në duar, ndërsa brohorasin në një zë: “Rama ik!”.
Pjesëmarrësit në tubim kanë kundërshtuar projektin që po zhvillohet në zonën e mbrojtur të Zvërnecit, duke e cilësuar atë si një kërcënim për mjedisin dhe trashëgiminë natyrore të vendit.
Protesta në Torino vjen në vijim të reagimeve të shumta të diasporës shqiptare në vende të ndryshme të Evropës. Manifestime kundërshtuese janë zhvilluar edhe në Londër, Gjermani dhe shtete të tjera, ku shqiptarët kanë dalë në mbështetje të protestave që po zhvillohen në Shqipëri kundër projektit të shumëdebatuar.
Diaspora shqiptare po shfaqet gjithnjë e më aktive në këtë çështje, duke kërkuar që zëri i qytetarëve dhe shqetësimet për mbrojtjen e mjedisit të dëgjohen nga autoritetet shqiptare.
