Nga Boldnews.al
Evis Berberi, drejtori i Autoritetit Rrugor Shqiptar, ka “qethur” institucion që drejton, duke i dhënë një tender firmës “2 T”. Sipas dokumenteve që disponon Boldnews.al, ARRSH ka finalizuar kontratën C, të mirëmbajtjes së rrugëve, ndërsa tenderi është fituar nga firma e vetme në garë që ka marrë rreth 99 % të fondit të akorduar.
Sipas dokumenteve nga Qendra Kombëtare e Biznesit, firma “2T” është në pronësi të Dritan Troksit dhe Artan Sakos. Ky i fundit është edhe vëllai i komandantit të gardës së republikës, Gramos Sako.
Gjithashtu në media, kjo firmë, është aluduar edhe si “ndërtuesi i pallatit të Linda Ramës”. Pas këtyre ndërtimeve, firma tepelenase ka filluar të marrë me “thasë” para publike, teksa së fundmi është akomoduar te drejtuesi i ARRSH-së.
Sipas dokumenteve që disponon Boldnews.al, Autoriteti Rrugor Shqiptar, ka finalizuar tenderin me objekt “mirëmbajtje me performancë e akseve kryesore të tre rajoneve”. bëhet fjalë për kontratën C, “mirëmbajtje me performancë e akseve kryesore të Rajonit Qendror dhe Juglindor”.
Të gjitha lotet e mirëmbajtjes kanë një vlerë rreth 50 milionë euro, ndërkohë loti 3, ka një vlerë totale 1.455.726.087 lekë me TVSH, ose rreth 12 milionë euro.
Në dokumentet e tenderit shkruhej se kriteret e përzgjedhjes së fituesit ishte oferta ekonomikisht më e favorshme bazuar në kost. “Me anë të kësaj bëjmë me dije se, në këtë procedurë /lot kanë marrë pjesë operatorët ekonomikë të mëposhtëm me vlerat përkatëse si më poshtë: “2 T”.
Vlera e ofruar, ose totali i çmimeve për njësi dhe vlera e pritshme e kontratave, nëse është e zbatueshme, është 1.455.620.460 lekë” thuhej në dokumente. Pra, shumë afër fondit limit, ose mbi 99 % të fondit të akorduar nga Autoriteti Rrugor Shqiptar.
Pra, në një nga tenderat më të majmë të Autoritetit Rrugor Shqiptar, paraqitet në garë vetëm një firmë, e cila merr edhe qindarkat e fundit.
Në dokumentet shoqëruese, ARRSH parashikon që fituesi i kësaj kontrate, “2 T”, do të mirëmbajë segmentet Elbasan – Qafë Thanë, Dogana Qafë Thanë – Pogradec. Tiranë – Elbasan (e reja), Korçë – Kapshticë, Rrogozhinë – Fier, Rrogozhinë – Elbasan, Pogradec – Dogana Tushemisht. Gjithashtu edhe rrugët Ura Zaranikës (Elbasan) – Rotondo, Lushnje – Berat apo edhe Cërrik – Gramsh.
“Shërbimet që do mundësohen përfshijnë gjithë veprimtaritë, fizike dhe të tjera, që duhet të kryhen nga kontraktori, sipas përputhshmërisë së tyre me nivelet e shërbimit bazuar ne zbatimin e te gjitha specifikimeve teknike” thuhet në dokumente. Më tej thuhet se firma duhet të bëjë punime asfalti, nivelimi i bankinave, rifreskimi i sinjalistikës vertikale dhe horizontale. Por, për sinjalistikën, ARRSH ka bërë tendera të tjerë, duke sjellë mbivendosjen e tenderëve të kryer.
