Ka përfunduar seanca në Gjykatën e Apelit ndaj ish-deputetit të Partisë Socialiste, Alqi Bllakos. Bllako, përmes avokatit të tij mbrojtës, kërkoi masë më të butë sigurie. Por, apeli ka vendosur ta lërë në burg.
Bllako akuzohet për “Shpërdorim të detyrës” në bashkëpunim dhe “Korrupsion pasiv i funksionarëve të lartë shtetërorë” në hetimin për inceneratorin e Elbasanit. Pas arrestimit, ai u la nën masën arrest me burg nga shkalla e parë, e konfirmuar tanimë dhe në apel.
Sipas prokurorisë, Alqi Bllako, ish-ministri i Mjedisit Lefter Koka dhe një vartës i këtij të fundit akuzohen se kanë paraqitur dokumente të falsifikuara për llojin e tokës ku do të ndërtohej inceneratori i Fierit. Ata ia kanë paraqitur qeverisë sikur ndërtesa e inceneratorit do të bëhej në tokë truall. SPAK ka provuar se ajo është ndërtuar në tokë arë, vlera e së cilës është më e lirë. Ky falsifikim vlerësohet se i ka sjellë buxhetit të shtetit një dëm prej rreth 140 mijë eurosh.
Po ashtu, sipas SPAK, Bllako ka përfituar rreth 150 mln Lekë duke favorizuar kompaninë fituese të koncesionit të djegësit të Fierit. Paratë, sipas hetimeve, janë marrë përmes punësimit të të atit në një nga kompanitë e Klodian Zotos.
Bllako nga ana tjetër ka mohuar akuzat e ngritur ndaj tij.
