Policia e Shtetit, me uniformë dhe pa uniformë, ka arrestuar një shofer 21-vjeçar që rezultoi se po drejtonte makinën i droguar. Të riut me S.D iu hoq patenta për një vit dhe iu vu dhe një gjobë prej 15 mijë lekësh.
Ky arrestim ishte i dyti i kësaj natyre, sepse 4 ditë më parë, Policia Rrugore e Tiranës, vuri në pranga një 25-vjeçar për të njëjtin shkak.
S.D. u zbulua gjatë kontrolleve policore në rrugën “Xhanfize Keko”, ku oficerët i kanë bërë testin e drogës me aparatin “AquilaScan”.
Në përfundim të veprimeve procedurale, u bë arrestimi në flagrancë i tij, për veprën penale “Drejtimi i automjeteve në mënyrë të parregullt”.
Gjithashtu, iu pezullua leja e drejtimit për 12 muaj, iu zbritën 10 pikë nga leja e drejtimit dhe iu vendos masa administrative 15.000 lekë të rinj, për shkeljen e nenit 185 të parashikuar nga Kodi Rrugor, “Drejtimi i mjetit nën efektin e lëndëve droguese”, matur me aparatin drogëtestues të markës “AquilaScan”.
