Ashtu si shefi i tij politik Edi Rama, edhe Erion Veliaj sulmoi protestat qytetare kundër rritjes së çmimeve, të zhvilluara ditët e fundit.
“Po bëjmë protesta nga më të paqënat”, tha Veliaj në një aktivitetet transmetuar këtë të Martë në FB-në e kryeministrit Edi Rama, ku kryetari i Bashkisë së Tiranës u shfaq krah kreut të Qeverisë dhe ministres së Financave.
Gjatë fjalës së tij, Veliaj mohoi ekzistencën e varfërisë ekstreme në vend.
“Ne s’jemi të pasur por atë lloj varfërie ekstreme që e shef në shumë kryeqytete ne e kemi mitiguar. Një pjesë është mitiguar duke ulur pagesën e energjisë, taksat, tatimet, TVSH. Një pjesë tjetër megjithë këtë rrjet social ku ne ndonjëherë akuzohemi te avokati i Popullit që i marrim me dhunë në situatë minus zero, disa që le të themi punojnë në jetën e natës, ose duan të flenë në rrugë. Ku detyrohemi të themi ‘jo, sa është minus 0 ti do vish me detyrim në një vend të ngrohtë dhe pastaj nëse do të jetosh në një cep…”, tha Veliaj.
Teksa u ndal te koncerti i këngëtarit Maluma dje në Tiranë, Veliaj bëri apel që qytetarët të tregohen solidarë me njeri-tjetrin në kohë krize.
“Teksa po i shpjegoja Edit kush është Malulma i tregova prova që kishte dhe njerëz që ishin paguar dhe një mijë euro që të pinin kafe me të, a të dilnin fotografi me të. Jetojmë në kapitalizëm… Kush ka mundësi të shkoj te Maluma të shikojë dhe fqinjin e vetë. Nëse presim vetëm nga shteti s’kemi kuptuar thelbin e krizës ku jemi”, tha ai.
“Shumica e heshtur e Tiranës, është jo vetëm është disa herë më e madhe, por disa herë më e përgjegjshme se një pakice e zhurmshme që sa herë që hapet shesh për përshesh është prezente”, sulmoi ai më tej protestat qytetare.
