KQZ i konsideroi si jokushtetuese kërkesat e PD për referendum për Pakun Rinia dhe ndërhyrjet e Bashkisë së Tiranës te Parku i Liqenit Artificial, ndërsa protestat nga aktivistët vazhdojnë ende.
Komisioni Qendror i Zgjedhjeve në mbledhjen e së mërkurës vendosi të rrëzojë tre kërkesat për referendum vendor të drejtuara këtij institucioni nga Partia Demokratike në fillim të marsit, në lidhje me Parkun Rinia, ndërtimin e një këndi lodrash tek Parku i Liqenit, si dhe një kërkesë të tretë që lidhej me zonën rreth këtij parku.
KQZ vendosi rrëzimin e mbajtjes së referendumeve për pyetjet: “A jeni dakord që në territorin e Parkut Rinia të Bashkisë së Tiranës, të ndërtohet një parkim nëntokësor?”; “A jeni dakord që brenda Parkut të Liqenit në Bashkinë e Tiranës, në dy anët e Korpusit të Universitetit Politeknik, të ndërtohen objekte, qofshin këto edhe social-kulturore, universitare apo administrative?” dhe “A jeni që të ndërtohet kënd lojërash duke betonizuar zemrën e Parkut të Liqenit në Bashkinë e Tiranës?”
Komisionit Qendrori Zgjedhjeve i ka konsideruar kërkesat si antikushtetuese pasi ato ngrihen për vendime që janë marrë tashmë nga Këshilli Bashkiak i Tiranës.
Referendumet vendore janë një formë e vetëqeverisjes vendore. Nëse do të miratohej kërkesa e PD për referendume mbi tre çështjet e mësipërme, do të duhej mbështetja e 20,000 zgjedhësve në Bashkinë Tiranë.
Më 30 dhjetor 2015, Këshilli Bashkiak i Tiranës riktheu në fuqi një kontratë koncesioni për një parking nëntokësor në Parkun Rinia. Sipas Bashkisë koncesioni ishte miratuar fillimisht në vitin 2009, por që nuk qe vënë në zbatim që nga ajo kohë. (link projektakti i Këshillit Bashkiak).
Në kontratë parashikohet që kompania fituese e koncesionit Taiëan sh.p.k të marrë një sipërfaqe të Parkut Rinia për ta kthyer atë në parking nëntokësor me kapacitet 1342 vende duke investuar 13.5 milionë euro, ku bashkia pritet të marrë 10 për qind të fitimeve.
Aktivistët mjedisorë kanë organizuar disa protesta për këtë koncesion duke argumentuar se ai do të prishë gjelbërimin e parkut dhe do të ndikojë në shtimin e trafikut dhe ndotjes nga makinat në qendër të qytetit.
Bashkia e Tiranës kreu një tjetër lëvizje befasuese në fillim të shkurtit kur rrethoi një hapësirë brenda Parkut të Liqenit Artificial për të ndërtuar një park lodrash për fëmijë me vlerë 650 milionë lekë të vjetra.
Ky projekt ka shkaktuar një valë protestash dhe përplasjesh të dhunshme me policinë nga ana e aktivistëve, të cilët pretendojnë se projekti është kryer në mënyrë jotransparente, pa u konsultuar me publikun dhe se urbanizon parkun e liqenit.
Aktivistët kanë kërkuar ndalimin e punimeve dhe kanë denoncuar prerjen e pemëve dhe përdorimin e betonit në atë që autoritetet pretenduan se do të ishte një park ekologjik që nuk do ta shtjetërsonte parkun. Ata kanë kërkuar ndërhyrjen e Ministrisë së Mjedisit për të verifikuar ligjshmërinë e punimeve që Bashkia Tiranë ka filluar prej disa javësh. /Reporter.al/
(Boldnews)
